ଭିଜିଲାନ୍ସ ଜାଲରେ ତହସିଲଦାର; ଜଣେ ଲୋକ ୫ଟି ପାନ୍‌ କାର୍ଡ଼

କଟକ: ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ମଙ୍ଗଳବାର ପୁରୀ ଜିଲା ନିମାପଡା ତହସିଲଦାର ରାମଚନ୍ଦ୍ର ଜେନାଙ୍କ ଘରେ ଭିଜିଲାନ୍ସ ପକ୍ଷରୁ ଚଢାଉ ହୋଇଛି। ତହସିଲଦାରଙ୍କ ପୁରୀ ସରକାରୀ ବାସଭବନ ଏବଂ କଟକ ସିଡିଏରେ ଥିବା ବାସଭବନ ସମେତ ଅନ୍ୟ କେତେକ ସ୍ଥାନରେ ଚଢ଼ାଉ ଜାରି ରହିଛି । ଖାସ୍‌ କଥା ହେଉଛି ତାଙ୍କଠାରୁ ଭିନ୍ନ ଭିନ୍ନ ନମ୍ବର ଥିବା ୫ଟି ପାନ୍‌ କାର୍ଡ଼ ଜବତ ହୋଇଛି।

ପୁରୀର ସରକାରୀ ବାସଭବନରେ ଭିଜିଲାନ୍ସ ପକ୍ଷରୁ ତାଙ୍କୁ ଅଟକ ରଖାଯାଇ ଘରେ ଚଢାଉ କରାଯାଇଥିଲା। ଖୋଳତାଡ଼ ସମୟରେ ନଗଦ ୪ ଲକ୍ଷ ୬୫ ହଜାର ଟଙ୍କା ଜବତ କରାଯାଇଥିଲା । ଏଥିସହ ନିମାପଡ଼ାଠାରେ ଥିବା ତାଙ୍କ ସରକାରୀ କ୍ୱାର୍ଟରରେ ଖୋଜାଖୋଜି ବେଳେ ନଗଦ ୫୦ ହଜାର ଟଙ୍କା ଜବତ ହୋଇଛି।

ସେହିପରି କଟକର ସିଡିଏ ସେକ୍ଟର-୧୧ଠାରେ ଥିବା ତାଙ୍କ ବାସଭବନ, ଯାଜପୁର ଜିଲ୍ଲାର ଧାନମଣ୍ଡଳ ସ୍ଥିତ ପୈତୃକ ବାସସ୍ଥାନ, କେନ୍ଦ୍ରାପଡ଼ା ଜିଲ୍ଲାର ଗରଦପୁର ବ୍ଲକରେ ଥିବା ଘରେ ଭିଜିଲାନ୍ସ ଚଢ଼ାଉ ଜାରି ରହିଛି । ତାଙ୍କ ମୋଟ୍‌ ସମ୍ପତ୍ତିର ଆକଳନ ଚାଲିଛି।