ନୀଳଗିରି: ସ୍ୱାମୀ ଘରେ ନଥିବା ସୁଯୋଗରେ ଜଣେ ଯୁବକ ମହିଳାଙ୍କ ବେକରେ କଟୁରୀ ଲଗାଇ ବଳାତ୍କାର କରିବା ଘଟଣା ଅଞ୍ଚଳରେ କ୍ଷୋଭ ସୃଷ୍ଟି କରିଛି । ବାଲେଶ୍ୱର ଜିଲା, ନୀଳଗିରି ଥାନା ଅଧୀନ ଧୋବଶିଳା ପଞ୍ଚାୟତରେ ଏଭଳି ଅଭିଯୋଗ ଆସିଛି । ଉକ୍ତ ପଞ୍ଚାୟତରେ ଥିବା ଏକ ଗାଁରେ ଜଣେ ଆଦିବାସୀ ମହିଳା ତା’ କୁନି ପିଲାକୁ ଧରି ରାତିରେ ଘରେ ଶୋଇଥିଲେ । ସ୍ୱାମୀ ତାଙ୍କ ସମ୍ପର୍କୀୟଙ୍କ ଘରକୁ ଯାଇଥିବା ଜାଣି ସେହି ଗାଁର ଆକାଶ ବିନ୍ଧାଣୀ ନାମକ ଯୁବକ ଘରେ ପଶି ମହିଳାଙ୍କୁ ଅସଦାଚରଣ କରିଥିଲେ । ମହିଳା ଜଣକ ଏଥିରେ ପ୍ରତିବାଦ କରିବାରୁ ଅଭିଯୁକ୍ତ ଜଣକ ତାଙ୍କ ବେକରେ କଟୁରୀ ଲଗାଇ ବଳାତ୍କାର କରିଥିବା ଅଭିଯୋଗ ହୋଇଛି । ଏହି କଥା କାହାରିକୁ କହିଲେ ଜୀବନରୁ ମାରିଦେବେ ବୋଲି ଧମକ ମଧ୍ୟ ଦେଇଥିଲେ ।
ସ୍ୱାମୀ ଘରକୁ ଫେରିବା ପରେ ମହିଳା ଜଣକ କାନ୍ଦି କାନ୍ଦି ସମସ୍ତ ଘଟଣା କହିବା ପରେ ଏନେଇ ଗାଁରେ ବୈଠକ ହୋଇଥିଲା । ହେଲେ ଅଭିଯୁକ୍ତ ଜଣକ ଉକ୍ତ ବୈଠକକୁ ନଆସି ଓଲଟା ଧମକ ଚମକ ଦେଇଥିଲା । ଏନେଇ ପୀଡ଼ିତା ଜଣକ ଆଜି ନୀଳଗିରି ଥାନାରେ ରିପୋର୍ଟ ଦେଇଛନ୍ତି । ସେପଟେ ସମାନ ରାତିରେ ବଳାତ୍କାରର ଶିକାର ହୋଇଥିବା ପୀଡ଼ିତାଙ୍କ ସ୍ୱାମୀ କୁଆଡ଼େ ଅଭିଯୁକ୍ତର ସ୍ତ୍ରୀକୁ ଅସଦାଚରଣ କରିଥିବା ନେଇ ମଧ୍ୟ ଏକ ପାଲଟା ଏତଲା ଦାଏର କରାଯାଇଛି । ପୁଲିସ ଉକ୍ତ ଘଟଣାରେ ଅଭିଯୁକ୍ତ ଏବଂ ପୀଡ଼ିତାଙ୍କ ସ୍ୱାମୀକୁ ଅଟକ ରଖି ତଦନ୍ତ ଚଳାଇଛି ।
