ନୂଆଦିଲ୍ଲୀ: ଜାତୀୟ ତଦନ୍ତକାରୀ ସଂସ୍ଥା – ଏନ୍ଆଇଏ କାଶ୍ମୀର ଉପତ୍ୟକାର ବିଚ୍ଛିନ୍ନତାବାଦୀମାନଙ୍କ ଘରେ ଖାନତଲାସୀ କରିଛି। ସନ୍ତ୍ରାସବାଦୀମାନଙ୍କୁ ପାଣ୍ଠି ପ୍ରଦାନ ସଂକ୍ରାନ୍ତରେ ଏନ୍ଆଇଏ ଏହି ଖାନତଲାସୀ କରିଥିବା ଜଣାପଡିଛି। ଏନ୍.ଆଇ.ଏ.ର ଅଧିକାରୀମାନଙ୍କ ସମେତ ସ୍ଥାନୀୟ ପୁଲିସ୍ ଓ ସି.ଆର୍.ପି.ଏଫ୍. ଯବାନମାନଙ୍କ ସହାୟତାରେ ୯ଟି ସ୍ଥାନରେ ଖାନତଲାସୀ କରାଯାଇଛି। ମିଳିଥିବା ସୂଚନା ଅନୁଯାୟୀ, ମିର୍ୱେଜ୍ ଉମର ଫାରୁକ୍ , ସୟଦ୍ ଅଲି ଶାହା ଗିଲାନୀଙ୍କ ପୁଅ ନୟିମ୍ ଗିଲାନୀ, ୟାସିନ୍ ମଲ୍ଲିକ, ଶବୀର ଶାହା, ଅସ୍ରଫ୍ ଶେହରାଇ ଓ ଜାଫର୍ ଭଟ୍ଟଙ୍କ ଘରେ ମଙ୍ଗଳବାର ଖାନତଲାସୀ କରାଯାଇଛି। ପାକିସ୍ତାନରୁ ହାୱଲା ଚ୍ୟାନେଲ୍ ମାଧ୍ୟମରେ ବିଚ୍ଛିନ୍ନତାବାଦୀମାନଙ୍କୁ ପାଣ୍ଠି ମିଳୁଥିବା ସମ୍ପର୍କିତ ମାମଲାକୁ ନେଇ ଏହି ଚଢ଼ାଉ କରାଯାଇଛି।