ନୂଆଦିଲ୍ଲୀ: ପାକିସ୍ତାନ ଅଧିକୃତ କାଶ୍ମୀର ଇଲାକାର ଆତଙ୍କବାଦୀ ଶିବିର ଉପରେ ବିମାନ ବାହିନୀର ବୋମାମାଡ଼କୁ ବିଭିନ୍ନ ରାଜନୈତିକ ଦଳଗୁଡ଼ିକ ପକ୍ଷରୁ ପ୍ରଶଂସା କରାଯାଇଛି। ପ୍ରଧାନମନ୍ତ୍ରୀଙ୍କ ରାଜନୈତିକ ଇଚ୍ଛା ବଳରେ ଏହି କାର୍ଯ୍ୟ ସମ୍ପାଦନ କରାଯାଇଛି ବୋଲି ବି.ଜେ.ପି. କହିଥିବା ବେଳେ ଦଳର ସାଧାରଣ ସମ୍ପାଦକ ରାମ ମାଧବ କହିଛନ୍ତି, ପୁଲ୍ୱାମା ଆତଙ୍କବାଦୀ ଆକ୍ରମଣରେ ଯବାନମାନଙ୍କ ଶହୀଦ୍ ହୋଇଥିବା ଘଟଣାରେ କଷ୍ଟ ଓ ଦୁଃଖ ପାଇଥିବା ପ୍ରତ୍ୟେକ ଭାରତୀୟମାନେ ଆନନ୍ଦ ପ୍ରକାଶ କରିଛନ୍ତି। ଏଭଳି ବିଚକ୍ଷଣ କାର୍ଯ୍ୟାନୁଷ୍ଠାନ ପାଇଁ ସେ ବିମାନ ବାହିନୀକୁ ସାଲ୍ୟୁଟ୍ ଜଣାଇଛନ୍ତି। କଂଗ୍ରେସ ସଭାପତି ରାହୁଲ୍ ଗାନ୍ଧି ବିମାନ ବାହିନୀର ପାଇଲ୍ଟମାନଙ୍କୁ ସାଲ୍ୟୁଟ୍ ଜଣାଇଛନ୍ତି। ଭାରତୀୟମାନଙ୍କୁ ନିରାପଦ ରଖିବାରେ ବିମାନ ବାହିନୀର ଭୂମିକାକୁ ଦଳ ପକ୍ଷରୁ ପ୍ରଶଂସା କରାଯାଇଛି। ଦିଲ୍ଲୀ ବିଧାନସଭା ବଜେଟ୍ ଅଧିବେଶନରେ ଉପସ୍ଥିତ ବିଧାୟକମାନେ ଏହି ଆକ୍ରମଣକୁ ପ୍ରଶଂସା କରିଛନ୍ତି। ବିମାନ ବାହିନୀକୁ ପ୍ରଶଂସା କରି ମହାରାଷ୍ଟ୍ର ବିଧାନସଭାରେ ଏକ ପ୍ରସ୍ତାବ ଗୃହୀତ ହୋଇଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ଏହି ବିମାନ ଆକ୍ରମଣକୁ ସ୍ୱାଗତ ଜଣାଇଛନ୍ତି।
Pay Online