ନୂଆଦିଲ୍ଲୀ: କରୋନା କାର୍ଯ୍ୟରେ ନିୟୋଜିତ ଶିକ୍ଷକମାନଙ୍କୁ କରୋନା ସମ୍ମୁଖ ଯୋଦ୍ଧାର ମାନ୍ୟତା ଦେବାକୁ ଜାତୀୟ ମାନବାଧିକାର ଆୟୋଗ (ଏନ୍ଏଚଆରସି) କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟକୁ ନିର୍ଦେଶ ଦେଇଛନ୍ତି। ଅନ୍ୟ କର୍ମଚାରୀଙ୍କ ଭଳି କରୋନା କାର୍ଯ୍ୟରେ ନିୟୋଜିତ ଶିକ୍ଷକଙ୍କୁ ପ୍ରତ୍ୟେକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସରକାର କରୋନା ସମ୍ମୁଖ ଯୋଦ୍ଧାର ମାନ୍ୟତା ଦିଅନ୍ତୁ। ଏ ସମ୍ପର୍କରେ ଆବଶ୍ୟକ ପଦକ୍ଷେପ ନେବାକୁ ଏନଏଚଆରସି ସ୍ବାସ୍ଥ୍ୟ ମନ୍ତ୍ରଣାଳୟକୁ ନିର୍ଦେଶ ଦେଇଛନ୍ତି। ଏହା ସହିତ କରୋନାରେ ସଂକ୍ରମିତ ହୋଇ ପ୍ରାଣ ହରାଇଥିବା ଶିକ୍ଷକ ପରିବାରକୁ ଅନ୍ୟ ସମ୍ମୁଖ ଯୋଦ୍ଧାଙ୍କ ଭଳି ଅନୁରୂପ କ୍ଷତିପୂରଣ ଓ ଚାକିରି ସୁବିଧା ପ୍ରଦାନ କରିବାକୁ ଏନ୍ଏଚଆରସି ନିର୍ଦେଶ ଦେଇଛନ୍ତି। ଏହି କାର୍ଯ୍ୟରେ ନିୟୋଜିତ ଶିକ୍ଷକଙ୍କୁ ବୀମାଭୁକ୍ତ କରିବାକୁ ମଧ୍ୟ କୁହାଯାଇଛି।
ପ୍ରମୁଖ ମାନବାଧିକାର କର୍ମୀ ତଥା ସର୍ବୋଚ୍ଚ ନ୍ୟାୟାଳୟର ଓକିଲ ରାଧାକାନ୍ତ ତ୍ରିପାଠୀଙ୍କ ପକ୍ଷରୁ ଦାୟର ଆବେଦନ ଉପରେ ଶୁଣାଣି କରି ଏନଏଚଆରସି ଏହି ନିର୍ଦେଶ ଦେଇଛନ୍ତି। ଓଡିଶା ସମତେ ବିଭିନ୍ନ ରାଜ୍ୟରେ ଶିକ୍ଷକମାନେ କରୋନା କାର୍ଯ୍ୟରେ ମୁତୟନ ଅବସ୍ଥାରେ ସଂକ୍ରମିତ ହୋଇ ପ୍ରାଣ ହରାଇଥିବାବେଳେ ସେମାନଙ୍କୁ ରାଜ୍ୟ ସରକାରଙ୍କ ପକ୍ଷରୁ କୌଣସି କ୍ଷତିପୂରଣ ରାଶି ଦିଆଯାଇ ନଥିବା ନେଇ ରାଧାକାନ୍ତ ଏନଏଚଆରସିଙ୍କ ଦୃଷ୍ଟି ଆକର୍ଷଣ କରିଥିଲେ। ବିଭିନ୍ନ ରାଜ୍ୟ ସରକାର ଶିକ୍ଷକମାନଙ୍କୁ ଶିକ୍ଷାଦାନ ଭିନ୍ନ ଅନ୍ୟାନ୍ୟ କାର୍ଯ୍ୟରେ ମୁତୟନ କରୁଛନ୍ତି। କରୋନା ସମୟରେ ରେଳ ଷ୍ଟେସନରେ ବାହାର ରାଜ୍ୟରୁ ଆସୁଥିବା ଯାତ୍ରୀଙ୍କ ନାମ ପଞ୍ଜୀକରଣ, ନିର୍ବାଚନ କାର୍ଯ୍ୟରେ ଶିକ୍ଷକଙ୍କୁ ନିଯୁକ୍ତ ଦିଆଯାଉଛି। ଉତ୍ତରପ୍ରଦେଶରେ ଶିକ୍ଷକ ସଂଗଠନଗୁଡିକ କରୋନା ଯୋଦ୍ଧାର ମାନ୍ୟତା ନେଇ ଦାବି କରିଆସୁଥିବାବେଳେ ରାଜ୍ୟ ସରକାର ଏହାକୁ ଅଗ୍ରାହ୍ୟ କରିଛନ୍ତି। ଅନ୍ୟପଟେ ଉତ୍ତରପ୍ରଦେଶ ପଞ୍ଚାୟତ ନିର୍ବାଚନ ପରିଚାଳନା ସମୟରେ ଶହଶହ ଶିକ୍ଷକ କରୋନା ସଂକ୍ରମିତ ହୋଇ ପ୍ରାଣ ହରାଇଥିବାବେଳେ ସେମାନଙ୍କୁ କରୋନା ଯୋଦ୍ଧା ଅନୁରୂପ କ୍ଷତିପୂରଣ ଦିଆଯାଇ ନାହିଁ। ଏ ସବୁ ପ୍ରସଙ୍ଗରେ ଅବଗତ ହେବା ପରେ ଏନଏଚଆରସି ଉପରୋକ୍ତ ନିର୍ଦେଶ ଦେଇଛନ୍ତି।
Comments are closed.