ପାଟଣା: ପାଟଣା ଥାନା ଅନ୍ତର୍ଗତ ଦାମାହୁଦା ପଞ୍ଚାୟତ କୁମୁଳାବାହାଳି ଗ୍ରାମର ରାମଚନ୍ଦ୍ର ମହାନ୍ତ ଗତକାଲି ତାଙ୍କ ଗର୍ଭବତୀ ବୋହୁକୁ ଡୁମୁରିଆ ପଞ୍ଚାୟତ କୋଠାଘର ଗ୍ରାମର ବାସିନ୍ଦା ତଥା କନ୍ୟା ପିତା ରବିନ୍ଦ୍ର ମହାନ୍ତ (୪୫) ଓ ତାଙ୍କ ପତ୍ନୀ ଆକ୍ରମଣ କରି ଗୁରୁତର କରିଥିବା ପାଟଣା ଥାନାରେ ଏତଲା ଦେଇଥିଲେ। ଏହି ଘଟଣାରେ ଆଜି କୋଠାଘର ଗ୍ରାମର ରବିନ୍ଦ୍ର ମହାନ୍ତଙ୍କ ପକ୍ଷରୁ ମଧ୍ୟ ପାଲଟା ମାମଲା ରୁଜୁ ହୋଇଛି। କୁମୁଳାବାହାଳି ଗ୍ରାମର ରାମଚନ୍ଦ୍ର ମହାନ୍ତ ଓ ତାଙ୍କ ସମ୍ପର୍କୀୟ କିଛି ଲୋକ ମାଡ଼ ମାରି ତାଙ୍କୁ ଗୁରୁତର କରିଥିବା ସେ ପାଟଣା ଥାନାରେ ଦେଇଥିବା ଏତଲାରେ ଜଣାଇଛନ୍ତି। ଖବର ଅନୁଯାୟୀ କୋଠାଘର ଗ୍ରାମର ରବିନ୍ଦ୍ର ମହାନ୍ତଙ୍କ ଝିଅ ସୁଜାତା କୁମୁଳାବାହାଳି ଗ୍ରାମର ରାମଚନ୍ଦ୍ର ମହାନ୍ତଙ୍କ ପୁଅ ଶରତଙ୍କୁ ପୂର୍ବରୁ ଭଲପାଇ ଆସୁଥିବା ବେଳେ ଗତ ୨ ମାସ ତଳେ ସୁଜାତା ଶରତଙ୍କ ଘରକୁ ଚାଲିଯାଇଥିଲେ। ତେବେ ସୁଜାତାଙ୍କ ବାପ ମାଆ ଏହି ବିବାହରେ ରାଜି ନଥିବା ସତ୍ବେ ପୁଅ ଘର ପକ୍ଷ ସୁଜାତାଙ୍କୁ ବୋହୂ ଭାବେ ସ୍ବୀକାର କରି ନେଇଥିଲେ। ସୁଜାତା ଏବେ ୪ ମାସର ଗର୍ଭବତୀ ମଧ୍ୟ ଅଛନ୍ତି। ରବିବାର ରାତି ପୁଅ ଘର ପକ୍ଷ ଗ୍ରାମବାସୀଙ୍କୁ ବାହା ଭୋଜି ଦେଇଥିଲେ। ତେବେ ଏହି ବିବାହରେ ରାଜି ନଥିବା କନ୍ୟା ପିତାମାତା ଗତକାଲି କୁମୁଳାବାହାଳି ଯାଇ ଝିଅକୁ ମାର ପିଟ କରିବା ସମୟରେ କୁମୁଳାବାହାଳି ଗ୍ରାମର କିଛି ଲୋକ ମଧ୍ୟ କନ୍ୟା ପିତା ରବିନ୍ଦ୍ରଙ୍କୁ ମାଡ଼ ମାରି ଗୁରୁତର କରିଥିଲେ। ନିଜ ଝିଅକୁ ଆକ୍ରମଣ କରିଥିବା ରବିନ୍ଦ୍ରଙ୍କ ମୋବାଇଲକୁ ତାଙ୍କ ଝିଅର ଶରତଙ୍କ ସହ ଅନ୍ତରଙ୍ଗ ମୁହୂର୍ତ୍ତର ଫଟୋ ପଠାଇ ତାଙ୍କୁ ବଦନାମ ପ୍ରଚେଷ୍ଟା କରାଯାଇଥିବାରୁ ଏଭଳି ଗଣ୍ଡଗୋଳ ଘଟିଥିବା ଚର୍ଚ୍ଚା ହେଉଛି। ତେବେ ରବିଦ୍ର ତାଙ୍କ ଝିଅକୁ ଫେରାଇ ଆଣିବାକୁ ଯାଇ ଥିବାବେଳେ ତାଙ୍କୁ କୁମୁଳାଵାହାଳି ଗ୍ରାମରେ ଆକ୍ରମଣ କରାଯାଇଥିବା ଅଭିଯୋଗ ଆଣିଛନ୍ତି।
Popular Categories
Previous article
Next article