ବୌଦ୍ଧ: ବୌଦ୍ଧଜିଲା ଆମ୍ବଝରୀ ପଞ୍ଚାୟତର ଡିଡିଙ୍ଗାପଦର ଗାଁ ମୁଣ୍ଡରୁ ଗତ ୩୦ ତାରିଖ ଦିନ ଏକ ଅଜଣା ଯୁବକର ମୃତ ଦେହ ଠାବ କରାଯାଇଥିଲା। ଶବଟି କ୍ଷତ ବିକ୍ଷତ ଓ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର ହୋଇଥିବା ବେଳେ ଏହାକୁ ଏକ ହତ୍ୟାକାଣ୍ଡ ଘଟଣା ବୋଲି ସନ୍ଦେହ କରି ପୁଲିସ ନିଜ ଆଡୁ ବୌଦ୍ଧ ଥାନା ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଜିଲା ଆରକ୍ଷୀ ଅଧିକ୍ଷକ ରାଜ ପ୍ରସାଦ, ଏସଡିପିଓ କୈଳାଶ ସେଠୀ, ବୌଦ୍ଧଥାନା ଅଧିକାରୀ ଶାରଦା ପ୍ରସନ୍ନ ଦାଶ, ମନମୁଣ୍ଡା ଥାନା ଅଧିକାରୀ ଭାବାନନ୍ଦ ପ୍ରଧାନ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିବାପରେ ବଲାଙ୍ଗୀରରୁ ସାଇଣ୍ଟିଫିକ୍ ଟିମ ଓ ଅନୁସନ୍ଧାନୀ କୁକୁର ଅଣାଯାଇ ଘଟଣାର ତଦନ୍ତ କରାଯାଇଥିଲା। ତଦନ୍ତରେ ପୁଲିସକୁ ବଡ ସଫଳତା ମିଳିବା ସହିତ ଏହା ଯୋଜନାବଦ୍ଧ ହତ୍ୟାକାଣ୍ଡ ବୋଲି ଜଣାପଡ଼ିଛି। ବୁଧବାର ଏନେଇ ବୌଦ୍ଧଥାନାଠାରେ ଏସପି ରାଜପ୍ରସାଦ ଏକ ସାମ୍ବାଦିକ ସମ୍ମିଳନୀରେ ଦେଇଥିବା ସୂଚନା ମୁତବାକ ଡିଡିଙ୍ଗାପଦର ହତ୍ୟାକାଣ୍ଡ ମାମଲାରେ ୬ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବା ବେଳେ ସେମାନଙ୍କ ନିକଟରୁ ଏକ ମାରୁତୀ ସୁଜୁକି କାର ଏବଂ ଏକ ଆପାଚି ବାଇକ୍, ୩ ଟି ସ୍ମାର୍ଟ ଫୋନ ଏବଂ ହତ୍ୟାକାଣ୍ଡରେ ବ୍ୟବହୃତ ଛୁରୀକୁ ପୁଲିସ ଜବତ କରିଛି। ପୁଲିସର ସୂଚନା ମୁତବାକ ମୃତକ ମଧୁ କହଁର ଜଣେ ଚାଷୀ ହୋଇଥିବା ବେଳେ ପୂର୍ବ ଶତ୍ରୁତାରୁ ତାଙ୍କୁ ହତ୍ୟା କରାଯାଇଥିବା ଅନୁମାନ କରାଯାଉଅଛି। ମୃତକ ଗୁଣିଗାରେଡି ବିଦ୍ୟା ମଧ୍ୟ ଜାଣିଥିଲେ। ତେଣୁ କୌଣସି ଘଟଣାକୁ ନେଇ ପୂର୍ବ ଶତ୍ରୁତାରୁ ତାଙ୍କୁ ଗଳାକାଟି ହତ୍ୟା କରାଯାଇଥିବା ପୁଲିସ ପ୍ରକାଶ କରିଛି। ଅଭିଯୁକ୍ତମାନଙ୍କ ପରିଚୟକୁ ପୁଲିସ ପକ୍ଷରୁ ଗୋପନ ରଖାଯାଇଛି।
Popular Categories
Previous article
Next article