ଠାକୁରମୁଣ୍ଡା : ମୟୂରଭଞ୍ଜ ଜିଲା ଠାକୁରମୁଣ୍ଡା ବନାଞ୍ଚଳ ଅନ୍ତର୍ଗତ ଚମ୍ପାଝର ଫୋରେଷ୍ଟ ବିଟ ଅଞ୍ଚଳରୁ ଉଦ୍ଧାର ହୋଇଥିବା ତୀର ବିଦ୍ଧ ବାରହା ମାମଲାରେ ପୁଲିସ ଜଣଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ରବିବାର ଅପରାହ୍ନରେ ବନବିଭାଗ ତୀର ବିଦ୍ଧ ବାରହାକୁ ଜବତ କରିଥିଲା।
ସୂଚନା ଯୋଗ୍ୟ, ଚମ୍ପାଝର ଗ୍ରାମପଞ୍ଚାୟତ ଅନ୍ତର୍ଗତ ସୁଦର୍ଶନପୁର ଗ୍ରାମ ନିକଟରେ ଥିବା ଶିମିଳିପାଳ ସଂରକ୍ଷିତ ଜଙ୍ଗଲ ସଂଲଗ୍ନରେ ରହିଥିବା ଧାନଚାଷ ବିଲ ଗୁଡ଼ିକରେ ଜଙ୍ଗଲ ଭିତରୁ ବାରହା ପଲ ଆସି ପାଚିଲା ଧନ ଫସଲ ନଷ୍ଟ କରି ଦିଅନ୍ତି। ତେଣୁ ଚାଷୀମାନେ ବିଭିନ୍ନ ଉପାୟରେ ବାରହା ପଲଙ୍କୁ ଘଉଡ଼ାଇ ଥାଆନ୍ତି। ରବିବାର ଅର୍ଥାତ ଗତକାଲି ଅପରାହ୍ନରେ ସୁଦର୍ଶନପୁର ଗ୍ରାମର ବିପିନ ବିହାରୀ ମହାନ୍ତ (୩୦)ଙ୍କ ଧାନ ବିଲରେ ବାରହା ପଲ ଧାନ ଫସଲ ଖାଉଥିବାର ଦେଖି ସେମାନଙ୍କୁ ଘଉଡ଼ାଇବାକୁ ଚେଷ୍ଟା କରିଥିଲେ। ପରେ ଏକ ଧନୁ ତୀର ନେଇ ବାରହା ପଲଙ୍କୁ ତୀର ମାରିଥିଲେ। ବାରହା ପଲ ଭିତରୁ ୨ ବର୍ଷର ଏକ ବାରହା ଦେହରେ ୩ଟି ତୀର ବାଜି ତା’ର ମୃତ୍ୟୁ ହୋଇଥିଲା। ବିପିନ ମୃତ ବାରହାକୁ ଆଣି ଜଙ୍ଗଲ ନିକଟରେ ଥିବା ଏକ ପୋଖରୀ କୂଳରେ ପୋତି ଦେଇଥିଲେ। ଖବରଟି ଜଣାପଡ଼ିବା ପରେ ଚମ୍ପାଝର ଫୋରେଷ୍ଟର ଗିରିଜା ନନ୍ଦ ଦଳେଇ, ଫୋରେଷ୍ଟ ଗାର୍ଡ଼ କିଶୋର ମହାନ୍ତ, ଟିପିଏଫ କର୍ମୀ ପରେଶ ଚନ୍ଦ୍ର ମହାନ୍ତ ବାରହାକୁ ପୋତି ଫେରୁଥିବା ବିପିନଙ୍କୁ ଗିରଫ କରିବା ସହ ଘଟଣାସ୍ଥଳରୁ ମୃତ ବାରହାକୁ ଜବତ କରିଥିଲେ। ବାରହାର ମୃତଦେହକୁ ବ୍ୟବଚ୍ଛେଦ ପାଇଁ ଠାକୁରମୁଣ୍ଡା ବନାଞ୍ଚଳକାର୍ଯ୍ୟାଳୟକୁ ଆଣିଥିଲେ। ଠାକୁରମୁଣ୍ଡା ବନାଞ୍ଚଳ କେଶ ନଂ ୧୨୮ ଅନୁଯାୟୀ ମାମଲା ରୁଜୁ ପରେ ଆଜି ବିପିନଙ୍କୁ କୋର୍ଟ ଚାଲାଣ କରିଛି।
Comments are closed.