ଚୌଦ୍ୱାର: ଚୌଦ୍ୱାର ଥାନା ମଙ୍ଗରାଜପୁର ପଞ୍ଚାୟତର କୋଚିଲାନୁଆଗାଁ ନିକଟସ୍ଥ ଡମଣୀ ପୀଠ ନିକଟରେ ଥିବା ଡ୍ୟାମରେ ବୁଡି ଜଣେ ଯୁବକ ନିଖୋଜ ହୋଇଥିବା ଜଣାପଡ଼ିଛି। ମିଳିଥିବା ସୁଚନା ଅନୁଯାୟୀ ପର୍ଯ୍ୟଟନସ୍ଥଳୀର ମାନ୍ୟତା ପାଇଥିବା ଡ଼ମଣୀ ପୀଠକୁ ରବିବାର କଟକ ସିଡ଼ିଏ ଅଞ୍ଚଳରୁ ୪ଜଣ ଯୁବକ ଭୋଜି କରିବାକୁ ଆସିଥିଲେ। ସେଠାରେ ଭୋଜି ଚାଲୁଥିବା ସମୟରେ ଯୁବକମାନେ ନିକଟସ୍ଥ ଡ୍ୟାମରେ ଗାଧୋଇବା ପାଇଁ ଯାଇଥିଲେ। ଗାଧୋଉଥିବା ବେଳେ ଗୋଡ଼ ଖସିଯିବାରୁ କଟକ ସିଡ଼ିଏ ଅଞ୍ଚଳର ଅଂଶୁମାନ ନାୟକ ନାମକ ଜଣେ ଯୁବକ ପାଣିରେ ବୁଡ଼ି ଯାଇଥିଲେ। ତାଙ୍କ ବଂଧୁମାନେ ତଥା ସ୍ଥାନୀୟ ଲୋକେ ଖୋଜାଖୋଜି କରି ତାଙ୍କୁ ନପାଇବାରୁ ଦମକଳ ବିଭାଗକୁ ଖବର ଦିଆ ଯାଇଥିଲା। ଚୌଦ୍ୱାର ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଦୀର୍ଘ ୪ଘଣ୍ଟା ଧରି ଖୋଜାଖୋଜି ଜାରୀ ରଖିଥିଲେ ହେଁ ସଂଧ୍ୟା ସୁଦ୍ଧା ଅଂଶୁମାନଙ୍କ କୌଣସି ପତ୍ତା ମିଳି ପାରି ନଥିବା ଜଣା ପଡ଼ିଛି। ଆଜି ପୁଣି ଖୋଜାଖୋଜି ଆରମ୍ଭ ହେବ ବୋଲି ଚୌଦ୍ୱାର ଫାୟାର ଅଫିସର ବିଷ୍ଣୁ ପ୍ରସାଦ ଦାସ ସୂଚନା ଦେଇଛନ୍ତି।
Popular Categories
Previous article
Next article