ଡେସ୍କ: କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ହୋଇଥିବା ମତଦାନ ପ୍ରକ୍ରିୟାରେ ନବ ବିବାହିତ, ଦିବ୍ୟାଙ୍ଗ, ଟ୍ରାନ୍ସଜେଣ୍ଡର ଏବଂ ଆଦିବାସୀ ଭୋଟଦାତାଙ୍କ ଉତ୍ସାହ ମତଦାନ ପ୍ରକ୍ରିୟାକୁ ସଫଳ କରିଛି। ରାଜ୍ୟର ୨୨୪ଟି ବିଧାନସଭା ଆସନ ଅନ୍ତର୍ଗତ ୫୮ ହଜାର ୫୪୫ଟି ମତଦାନ କେନ୍ଦ୍ରରେ ଭୋଟ ଗ୍ରହଣ ଶାନ୍ତିପୂର୍ଣ୍ଣ ଭାବେ ଶେଷ ହୋଇଛି। କର୍ଣ୍ଣାଟକରେ ପ୍ରାୟ ୭୨.୬୭% ମତଦାନ ହୋଇଛି। କର୍ଣ୍ଣାଟକ ବ୍ୟତୀତ ମେ ୧୦ରେ ପଞ୍ଜାବର ଜଳନ୍ଧର ସଂସଦୀୟ ଆସନ, ଓଡିଶାର ଝାରସୁଗୁଡା ବିଧାନସଭା ଆସନ, ଉତ୍ତରପ୍ରଦେଶର ଛନବେ ବିଧାନସଭା ଆସନରେ ନିର୍ବାଚିତ ପ୍ରତିନିଧିଙ୍କ ମୃତ୍ୟୁ ହେବା ଯୋଗୁ ଉପନିର୍ବାଚନ ହୋଇଛି।
କର୍ଣ୍ଣାଟକରେ ମହିଳା ଭୋଟରଙ୍କୁ ବିଶେଷ ଅଭିଜ୍ଞତା ପ୍ରଦାନ କରିବାକୁ ନିର୍ବାଚନ ଆୟୋଗ ଦ୍ୱାରା ନିଆଯାଇଥିବା ପଦକ୍ଷେପର ଏକ ଅଂଶ ଭାବରେ, ୯୯୬ଟି କେବଳ ମହିଳା ପରିଚାଳିତ ମତଦାନ କେନ୍ଦ୍ର ପ୍ରତିଷ୍ଠା କରାଯାଇଥିଲା ଯେଉଁଥିରେ ମହିଳା ସୁରକ୍ଷା କର୍ମୀଙ୍କ ସମେତ ସମସ୍ତ ମହିଳା ମତଦାନ କର୍ମଚାରୀ ରହିଥିଲେ। ନବ ବିବାହିତ ବରକନ୍ୟା ଅଧିକ ସଂଖ୍ୟାରେ ମତଦାନ କରିଥିଲେ।
ଭୋଟ ଦେବା ପାଇଁ ଉତ୍ସାହ ଏପରି ଥିଲା ଯେ ବଲାରୀର କୁର୍ଲାଗିଣ୍ଡି ଗ୍ରାମର ଜଣେ ୨୩ ବର୍ଷ ବୟସ୍କା ମହିଳା ମତ ଗ୍ରହଣ କେନ୍ଦ୍ରରେ ଏକ ଶିଶୁକୁ ଜନ୍ମ ଦେଇଥିଲେ। ମହିଳା ଅଧିକାରୀ ଏବଂ ମହିଳା ଭୋଟରମାନେ ଶିଶୁକୁ ପ୍ରସବ କରିବାରେ ସାହାଯ୍ୟ କରିଥିଲେ।
ପ୍ରଥମ ଥର ପାଇଁ ଶତାୟୁ ଏବଂ ଦିବ୍ୟାଙ୍ଗ ଭୋଟରଙ୍କ ପାଇଁ ଗୃହ ଭୋଟ୍ ସୁବିଧା ପ୍ରଦାନ କରାଯାଇଥିଲା। ଏହି ପ୍ରକ୍ରିୟାରେ ୮୦ ହଜାର ୨୫୦ ଜଣ ବରିଷ୍ଠ ନାଗରିକ, ୧୯ ହଜାର ୨୭୯ ଜଣ ଦିବ୍ୟାଙ୍ଗ ଏବଂ ୧୫ ହଜାର ୩୨୮ ଜଣ ଅତ୍ୟାବଶ୍ୟକ ସେବା କର୍ମଚାରୀ, ଏହିପରି ମୋଟ ୯୪ ହଜାର ୯୩୧ ଜଣ ନାଗରିକ ନିଜ ଘରେ ରହି ଭୋଟ୍ ଦେଇଛନ୍ତି।
