ଡେସ୍କ: ଓଟିଟି ପ୍ଲାଟଫର୍ମ ନେଟଫ୍ଲିକ୍ସ ଆନୁଷ୍ଠାନିକ କେତେକ ଦେଶରେ ସବସ୍କ୍ରିପସନ ଦର ବୃଦ୍ଧି କରିବା ପାଇଁ ଘୋଷଣା କରିଛି। ଯୁକ୍ତରାଷ୍ଟ୍ର ଆମେରିକା, କାନାଡା, ପର୍ତ୍ତୁଗାଲ ଏବଂ ଆର୍ଜେଣ୍ଟିନା ସମେତ ଅନେକ ଦେଶରେ ଏହାର ସବସ୍କ୍ରିପସନର ମୂଲ୍ୟ ବୃଦ୍ଧି ହେବ। ସଦ୍ୟତମ ଆୟ ରିପୋର୍ଟ ଅନୁଯାୟୀ, ନେଟଫ୍ଲିକ୍ସ ପ୍ଲାଟଫର୍ମ ସେବାରେ ଉନ୍ନତି ଆଣିବା ପାଇଁ ସବସ୍କ୍ରିପସନ ମୂଲ୍ୟ ବୃଦ୍ଧି କରୁଛି।
ମୂଲ୍ୟ ବୃଦ୍ଧି ପରେ ଷ୍ଟାଣ୍ଡାର୍ଡ ବିଜ୍ଞାପନ ମୁକ୍ତ ପ୍ଲାନର ମୂଲ୍ୟ ମାସିକ ୧୭.୯୯ ଡଲାର ହେବ, ଯାହା କି ୧୫.୪୯ ଡଲାରରୁ ଅଧିକ ହେବ। ବିଜ୍ଞାପନ ସମର୍ଥିତ ଏହି ପ୍ଲାନର ମୂଲ୍ୟ ୬.୯୯ ଡଲାରରୁ ୭.୯୯ ଡଲାର ହେବ । ଯଦି ଆପଣଙ୍କର ଏକ ପ୍ରିମିୟମ୍ ପ୍ଲାନ୍ ଅଛି, ତେବେ ଆପଣଙ୍କୁ ବର୍ତ୍ତମାନ ଅତିରିକ୍ତ ୨ ଡଲାର ଦେବାକୁ ପଡିବ। ପ୍ରିମିୟମ୍ ପ୍ଲାନର ମୂଲ୍ୟ ଏବେ ୨୪.୯୯ ଡଲାର ହେବ, ଯାହା କି ପୂର୍ବର ୨୨.୯୯ ଡଲାରରୁ ଅଧିକ।
ବାରମ୍ବାର ଦର ବୃଦ୍ଧି ସତ୍ତ୍ୱେ ଏହି ଷ୍ଟ୍ରିମିଂ କମ୍ପାନୀ ଗ୍ରାହକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଗତ ତ୍ରୟମାସରେ କଂପାନି ୧୯ ନିୟୁତ ନୂଆ ଗ୍ରାହକ ସହ ମୋଟ ଗ୍ରାହକ ସଂଖ୍ୟା ୩୦୦ ନିୟୁତରେ ପହଞ୍ଚିଛି। ବିଶ୍ୱ ବଜାରରେ ପ୍ରତିଦ୍ୱନ୍ଦ୍ୱିତା ବଢିବା ପରେ ଏହା ଘଟିଛି।
କମ୍ପାନିର କହିବା ଅନୁଯାୟୀ, ଉଚ୍ଚ ମାନର କଣ୍ଟେଣ୍ଟ ବଜାୟ ରଖିବା ଉଦ୍ଦେଶ୍ୟରେ ଏହି ମୂଲ୍ୟ ବୃଦ୍ଧି ରଣନୀତି ପ୍ରସ୍ତୁତ କରାଯାଇଛି। ବଢୁଥିବା ଷ୍ଟ୍ରିମିଂ ବଜାରରେ ପ୍ରତିଦ୍ୱନ୍ଦ୍ୱିତା ବଜାୟ ରଖିବା ପାଇଁ କମ୍ପାନୀ ଏହାର ବିଷୟବସ୍ତୁ ଉପରେ ଧ୍ୟାନ ଦେବ। ଏହା ବ୍ୟତୀତ, କମ୍ପାନୀ ବିଜ୍ଞାପନ ସହିତ ଏକ ନୂତନ ଯୋଜନା ଆଣିଛି। ଏହି ପ୍ଲାନରେ ଉପଭୋକ୍ତାମାନେ ଅତିରିକ୍ତ ଫି’ ପାଇଁ ନିଜ ଘର ବାହାରେ ଅତିରିକ୍ତ ବ୍ୟକ୍ତିଙ୍କୁ ଯୋଡ଼ିପାରିବେ। ଅଧିକ ଉପଭୋକ୍ତାଙ୍କୁ ଆକୃଷ୍ଟ କରିବା ପାଇଁ ପ୍ଲାଟଫର୍ମ ସ୍କ୍ୱିଡ୍ ଗେମ୍ ଏବଂ ଆର୍କେନ୍ ଭଳି ସୋ’ ସହିତ ସ୍ୱତନ୍ତ୍ର କ୍ରୀଡ଼ା ସମ୍ବନ୍ଧୀୟ ଇଭେଣ୍ଟ ଏବଂ ଏନ୍ଏଫ୍ଏଲ୍ ଗେମ୍ ଭଳି ଲାଇଭ୍ ଇଭେଣ୍ଟ ପ୍ରୋଗ୍ରାମିଂ ଉପରେ ମଧ୍ୟ ଧ୍ୟାନ ଦେଉଛି।
Comments are closed.