ନେମାଳ: କରୋନା ସଂକ୍ରମଣ ଜାରି ରହିଥିବା ବେଳେ ବାତ୍ୟା ୟାଶକୁ ନେଇ ଲୋକେ ଆତଙ୍କିତ ହୋଇ ପଡିଛନ୍ତି। ବାତ୍ୟାର ସଫଳ ମୁିକାବିଲା ପାଇଁ କଟକ ଜିଲ୍ଲାପାଳ ଭବାନି ଶଙ୍କର ଚଇନି ନେମାଳ ଥାନା ଅନ୍ତର୍ଗତ ବିଭିନ୍ନ ବାତ୍ୟା ଆଶ୍ରୟସ୍ଥଳୀ ପରିଦର୍ଶନ କରି ଲୋକମାନଙ୍କ ଥଇଥାନ ବ୍ୟବସ୍ଥାର ତଦାରଖ କରିଛନ୍ତି। ସମୀକ୍ଷା କାର୍ଯ୍ୟକ୍ରମରେ ମନ୍ତ୍ରୀ ପ୍ରତାପ ଜେନାଙ୍କ ପ୍ରତିନିଧି ପ୍ରାକ୍ତନ ସିସିବି ଅଧ୍ୟକ୍ଷ ଅଶୋକ କୁମାର ଓଝା, ବିଡିଓ କର୍ଣ୍ଣଦେବ ସମାଦାର, ଏବିଡିଓ ସୁଶାନ୍ତ କୁମାର ରଣା, ତହସିଲଦାର ମାନସ ରଞ୍ଜନ ତରାସିଆ ପ୍ରମୁଖ ଯୋଗଦେଇ ବିପଦ ସଙ୍କୁଳ ଅବସ୍ଥାରେ ଥିବା ଲୋକ ମାନଙ୍କୁ ଉତମ ଭାବେ ସାମାଜିକ ଦୂରତା ମଧ୍ୟରେ ଥଇଥାନ କରିବା ସହିତ ଖାଦ୍ୟ , ପାନିୟଜଳ ଓ ଔଷଧର ସୁବନ୍ଦୋବସ୍ତ କରିବା ପାଇଁ ପଞ୍ଚାୟତର ସରପଞ୍ଚ ଓ କାର୍ଯ୍ୟନିର୍ବାହୀ ଅଧିକାରୀ ପ୍ରମୁଖମାନଙ୍କୁ ସୁଚନା ଦେଇଥିଲେ। ପ୍ରତ୍ୟେକ ପଞ୍ଚାୟତରେ ଚାଳ ଛପର ଓ କଚାଘର ଏବଂ ବିପଦସଂକୁଳ ଅବସ୍ଥାରେ ଥିବା ଘର ମାନଙ୍କରେ ରହୁଥିବା ବ୍ୟକ୍ତିମାନଙ୍କୁ ସ୍ଥାନାନ୍ତର କରାଯାଇଛି।
ବର୍ଷା ପବନ ସମୟରେ ରୋଷେଇ କାର୍ଯ୍ୟ ଦ୍ୱାରା ରନ୍ଧା ଖାଦ୍ୟ, ଆଶ୍ରୟ ସ୍ଥଳରେ ଥିବା ବ୍ୟକ୍ତିମାନଙ୍କୁ ଯୋଗାଇ ଦେବା ଉପରେ ଗୁରୁତ୍ୱ ଦିଆଯାଇଛି। ରୋଷେଇ କାର୍ଯ୍ୟ ସଂପାଦନ ନହୋଇ ପାରିଲେ ନିରାପଦ ସ୍ଥାନରେ ଆଶ୍ରୟ ନେଇଥିବା ବ୍ୟକ୍ତିମାନଙ୍କ ପାଇଁ ଶୁଖିଲା ଖାଦ୍ୟ ଚୁଡା, ଗୁଡ, ଛତୁଆ, ବିସ୍କୁଟର ବ୍ୟବସ୍ଥା କରାଯିବା ଏବଂ ଆଶ୍ରୟ ସ୍ଥଳୀ ନିକଟରେ ବିଦ୍ୟୁତ ସରାବରାହ ବନ୍ଦ୍ ହେବାର ସମ୍ଭାବନା ଥିବାରୁ ଜେନେରେଟର ଦ୍ୱାରା ଆଲୋକୀକରଣ କରାଯିବା ଉପରେ ବିଭିନ୍ନ ପଞ୍ଚାୟତକୁ ଦାୟିତ୍ୱ ପ୍ରଦାନ କରାଯାଇଛି। ଏତଦ୍ବ୍ୟତୀତ ବ୍ଳକ କାର୍ଯ୍ୟାଳୟର ସମସ୍ତ କର୍ମଚାରୀଙ୍କୁ ମୁଖ୍ୟ ଦପ୍ତରରେ ରହିବା ଓ ଆବଶ୍ୟକ ପଡିଲେ ଜରୁରୀ ସେବାରେ ନିୟୋଜିତ କରାଯିବା ପାଇଁ ଜିଲ୍ଲାପାଳ ଶ୍ରୀଯୁକ୍ତ ଚଇନି ନିର୍ଦ୍ଦେଶ ଦେଇଛନ୍ତି।
