ନୂଆଦିଲ୍ଲୀ : ନ୍ୟାସନାଲ ହେରାଲ୍ଡ ମାମଲା ପରିପ୍ରେକ୍ଷୀରେ ନିଜର ଆୟକର ଆକଳନ ସମ୍ବନ୍ଧୀୟ ସମୀକ୍ଷା ବିରୋଧରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ, ତାଙ୍କ ମା’ ସୋନିଆ ଗାନ୍ଧୀ ଏବଂ କଂଗ୍ରେସ ନେତା ଓସ୍କାର ଫର୍ଣ୍ଣାଣ୍ଡିଜ୍ଙ୍କ ପକ୍ଷରୁ ହୋଇଥିବା ଆବେଦନକୁ ଦିଲ୍ଲୀ ହାଇକୋର୍ଟ ସୋମବାର ଖାରଜ କରିଦେଇଛନ୍ତି। ଫଳରେ ଗାନ୍ଧୀ ପରିବାର ଏବଂ ଓସ୍କାର ଫର୍ଣ୍ଣାଣ୍ଡିଜ୍ଙ୍କ ଆୟକର (୨୦୧୦-୧୨ ବର୍ଷ ପାଇଁ) ପୁନଃସମୀକ୍ଷା କରିବା ନେଇ ବିଭାଗୀୟ ଅଧିକାରୀଙ୍କ ପାଇଁ ପଥ ପରିସ୍କାର ହୋଇଛି। ଆୟକର କର୍ତ୍ତୃପକ୍ଷଙ୍କ ନିକଟରେ ସୋନିଆ ଏବଂ ରାହୁଲ ନିଜର ଆପତ୍ତି ପ୍ରକାଶ କରିପାରିବେ ବୋଲି ବିଚାରପତି ଏସ୍ ରବିନ୍ଦ୍ର ଭଟ୍ଟ ଏବଂ ଏ. କେ. ଚାୱଲାଙ୍କ ଖଣ୍ଡପୀଠ କହିଛନ୍ତି। ଗତମାସରେ ମାମଲାର ଶୁଣାଣି ବେଳେ ସୋନିଆ କୋର୍ଟରେ କହିଥିଲେ, ୟଙ୍ଗ ଇଣ୍ଡିଆ କମ୍ପାନୀର ୯୦ କୋଟିର ଋଣ ଅଂଶଧନରେ ପରିବର୍ତ୍ତନ ହେବା ପରେ ଏହା ଉପରେ ଆଉ ଶୁଳ୍କ ଆଦାୟ ଆବଶ୍ୟକ ନାହିଁ। ଉଲ୍ଲେଖ ଯେ, ୨୦୧୦ ନଭେମ୍ବରରେ ୫୦ ଲକ୍ଷ ଟଙ୍କାରେ ଆରମ୍ଭ ହୋଇଥିବା ୟଙ୍ଗ ଇଣ୍ଡିଆ ଇତିମଧ୍ୟରେ ଆସୋସିଏଟ ଜର୍ଣ୍ଣାଲସ ଲିମିଟେଡ (ଏଜେଏଲ)ର ସମସ୍ତ ଅଂଶଧନ ଅଧିଗ୍ରହଣ କରିଛି। ଏଜେଏଲ ଅଧୀନରେ ନ୍ୟାସନାଲ ହେରାଲ୍ଡ ରହିଛି। ଏହିକ୍ରମରେ ୟଙ୍ଗ ଇଣ୍ଡିଆ ଏଜେଏଲ୍ର ୯୦ କୋଟି ଟଙ୍କାର ଋର ଗ୍ରହଣ କରିଛି। ମାତ୍ର ସୋନିଆ ଓ ରାହୁଲ ୟଙ୍ଗ ଇଣ୍ଡିଆରେ ନିଜ ଅଂଶଧନ ମିଶାଇବା ବେଳେ ଏଜେଏଲ୍ର ସମ୍ପତ୍ତିର ଅନୁଚିତ ଉପଯୋଗ କରିଥିବା ନେଇ ଅଭିଯୋଗ ହୋଇଥିଲା।
Popular Categories
Previous article
Next article