ଭୋଗରାଇ: ଜଣେ ଗହଣା ଦୋକନୀଙ୍କୁ ଜନୈକ ବାଇକ୍ ଆରୋହୀ ପିଟି ପିଟି ହତ୍ୟା କରିଥିବା ଅଭିଯୋଗ ହୋଇଛି । ଏଭଳି ଏକ ଅଭାବନୀୟ ଘଟଣା ବାଲେଶ୍ବର ଜିଲା ଭୋଗରାଇ ଥାନା ପଥରେଶ୍ବର ଅଞ୍ଚଳରେ ଘଟିଛି ।
ପୁଲିସ ସୂଚନା ଅନୁଯାୟୀ ବାଲିଆପାଳ ବ୍ଳକ୍ ସିଂଲା ଅଞ୍ଚଳର ହରିଶଚନ୍ଦ୍ର କାମିଲା (୫୪) ବିଗତ ପ୍ରାୟ ୧୫ ବର୍ଷ ଧରି ଭୋଗରାଇ ଥାନା ରଣକୋଠା ଗ୍ରାମରେ ରହି ଏକ ଅଳଙ୍କାର ଦୋକନ ଚଳାଇ ଆସୁଥିଲେ । ବୁଧବାର ରାତି ପ୍ରାୟ ସାଢେ ୮ଟା ସମୟରେ ସେ ଏବଂ ତାଙ୍କର ଦୁଇ ଜଣ ବନ୍ଧୁ ଏକ ଚାରି ଚକିଆ ଯାନରେ ଚନ୍ଦନେଶ୍ବରରୁ ଫେରୁଥିଲେ । ପଥରେଶ୍ବର ନିକଟରେ ବିପରୀତ ଦିଗରୁ ଆସୁଥିବା ଏକ ବାଇକ ଓ ଚାରି ଚକିଆ ଗାଡି ମଧ୍ୟରେ ଧକ୍କା ହୋଇଥିଲା। ପରେ ବାଇକ ଆରୋହୀ ଶୁକଷଣ୍ଡା ପାଟଣା ଗ୍ରାମର ମଣ୍ଟୁ ଓରଫ ମୃତ୍ୟୁଞ୍ଜୟ ଗିରି ହରିଶ୍ଚଚନ୍ଦ୍ରଙ୍କୁ ମରଣାତ୍ମକ ଆକ୍ରମଣ କରିଥିଲେ । ଗୁରୁତର ଅବସ୍ଥାରେ ହରିଶ୍ଚଚନ୍ଦ୍ରଙ୍କୁ ପ୍ରଥମେ ଜଳେଶ୍ବରପୁର ଡାକ୍ତରଖାନା ଏବଂ ପରେ ବାଲେଶ୍ବର ସ୍ଥାନାନ୍ତର କରାଯାଇଥିଲା। ମାତ୍ର ରାସ୍ତାରେ ସାଲାଇନ ନଥିବାରୁ ତାଙ୍କୁ ପୁଣି ଜଳେଶ୍ବର ଫେରାଇ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ପୁଲିସ ଅଭିଯୁକ୍ତ ମୃତ୍ୟୁଞ୍ଜୟକୁ ଥାନାରେ ଅଟକ ରଖି ପଚରାଉଚର କରୁଛି ।