ସୁନ୍ଦରଗଡ଼ : ସଦର ଥାନା ଅନ୍ତର୍ଗତ ବାରଗାଡ଼ରେ ଦୁଇ ମଦ୍ୟପ ପୁଅ ନିଜ ମାଆଙ୍କୁ ଟାଙ୍ଗିଆ ଚୋଟରେ ହତ୍ୟା କରି ପୁଲିସ ଦ୍ୱାରା ଗିରଫ ହୋଇଛନ୍ତି। ଗତକାଲି ବିଳମ୍ବିତ ରାତିରେ ଏହି ଘଟଣା ଘଟାଇ ଶୁକ୍ରବାର ସକାଳେ ଶବକୁ ପୋଡ଼ିବାକୁ ଉଦ୍ୟମ କରୁଥିବା ବେଳେ ଗ୍ରାମବାସୀଙ୍କ କାନକୁ ଏହି କଥା ଯାଇଥିଲା। ଗ୍ରାମବାସୀଙ୍କୁ ଉକ୍ତ ମହିଳାଙ୍କ ମୃତ୍ୟୁ ଅସ୍ୱଭାବିକ ଲାଗିବାରୁ ଲୋକେ ପୁଲିସକୁ ସୂଚନା ଦେଇଥିଲେ। ସଦର ପୁଲିସ ଘଟଣାସ୍ଥଳରେ ପହଞ୍ଚି ପ୍ରଥମେ ଅଭିଯୁକ୍ତ ଦ୍ୱୟଙ୍କୁ ଥାନାକୁ ନେଇ ତଦନ୍ତ ଆରମ୍ଭ କରିଛି। ଏହି ପରିବାରର ପ୍ରତ୍ୟେକ ସଦସ୍ୟ ମଦ୍ୟପାନ କରି ଅହରହ ଝଗଡ଼ା କରିବା ତାଙ୍କ ନୀତିଦିନିଆ ଘଟଣା ବୋଲି ଗ୍ରାମବାସୀ କହିଛନ୍ତି। ହେଲେ ଗତକାଲି ରାତିର ଘଟଣା ଜଣାପଡ଼ିବା ପରେ ସମସ୍ତଙ୍କୁ ଏହା ମର୍ମାହତ କରିଛି। ପରିବାର ମଧ୍ୟରେ ନୂଆଁଖାଇକୁ ଧୁମଧାମରେ ପାଳନ କରିବା ପାଇଁ ଟିକେଶ୍ୱରୀ କିଶାନ ଓରଫ ପୁଲମତୀ କିଶାନ ସମସ୍ତ ବ୍ୟବସ୍ଥା କରି ଚାଲିଥିବା ବେଳେ ଦୁଇ ମଦ୍ୟପ ପୁଅ ନବୀନ କିଶାନ(୩୫) ଓ ବିପିନ କିଶାନ(୩୦) ମିଳିତ ଭାବେ ତାକୁ ହତ୍ୟା କରି ଥିବା କଥା ପୁଲମତୀର ବିବାହିତ ଝିଅ ବୀଣା କିଶାନ ପୁଲିସକୁ ସୂଚନା ଦେଇଛି। ନିଜ ମାଆଙ୍କୁ ହତ୍ୟା କରିବା ପରେ ଦୁଇ ଭାଇଙ୍କ ମଧ୍ୟରୁ ସାନ ଭାଇ ବିପିନ ବୀଣାଙ୍କୁ ଫୋନ ଯୋଗେ ଖବର ଦେଇଥିଲା। ତେବେ ସେ ଖବର ପାଇ ତାଙ୍କ ଶାଶୁ ଘରୁ ଆସି ଶୁକ୍ରବାର ପହଞ୍ଚିଲା ପରେ ମଧ୍ୟ ଦୁଇ ଭାଇ ଉଭୟେ ଉଭୟଙ୍କୁ ଦୋଷାରୋପ କରି ଝଗଡ଼ା ହେଉଥିବା କଥା ସେ କହିଥିଲେ। ଗୋଟିଏ ପଟେ ବୀଣାର ସୂଚନା ଓ ଅନ୍ୟପଟେ ଗ୍ରାମବାସୀଙ୍କ ସନ୍ଦେହ ଉଭୟଙ୍କ ଉପରେ କେନ୍ଦ୍ରୀଭୂତ ହୋଇଛି। ଗ୍ରାମବାସୀ ଏହି ଘଟଣା ସମ୍ପର୍କରେ ପୁଲିସକୁ ସୂଚନା ଦେଇ ନ୍ୟାୟ ଦାବି କରିଛନ୍ତି। ବାରଗାଡ଼ର ଏହି ନିର୍ଦ୍ଧିଷ୍ଟ ସ୍ଥାନ ସଦର ପୁଲିସ ଓ ଭଷ୍ମା ପୁଲିସର ପରିସରରେ ଆସିଥିବାରୁ ଉଭୟ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଘଟଣାର ପ୍ରାଥମିକ ସୂଚନା ଅନୁସାରେ ସଦର ଥାନାରେ ଏକ ହତ୍ୟାଘଟଣା ପଞ୍ଜିକୃତ କରାଯାଇଥିବା କଥା ତଦନ୍ତକାରୀ ଅଧିକାରୀ କହିଛନ୍ତି। ଘଟଣାସ୍ଥଳରେ ପୁଲିସ ଟିମ ପହଞ୍ଚି ଶବକୁ ଜବତ କରିବା ସହ ହତ୍ୟାକାଣ୍ଡରେ ବ୍ୟବହୃତ ହୋଇଥିବା ଟାଙ୍ଗିଆକୁ ଜବତ କରିଛି। ତେବେ ସଂପୂର୍ଣ୍ଣ ତଦନ୍ତ ପରେ ଘଟଣାର ସତ୍ୟତା ଜଣାପଡ଼ିବ ଓ ସେହି ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ତଦନ୍ତକାରୀ ଅଧିକାରୀ କହିଛନ୍ତି। ଗ୍ରାମବାସୀ ହୁଅନ୍ତୁ ଅବା ମୃତ ମହିଳାଙ୍କ ଝିଅ ହୁଅନ୍ତୁ ଏହି ବର୍ବର ହତ୍ୟାକାଣ୍ଡ ମଦ୍ୟପାନର କୁପରିଣତି ବୋଲି ସ୍ପଷ୍ଟ ହୋଇଛି।
