ନୂଆଦିଲ୍ଲୀ: ଆଇପିଏଲ୍ ବେଟିଂ ଦୁର୍ନୀତିରେ ଭାରତୀୟ କ୍ରିକେଟ ଟିମର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କ ନାମକୁ ଟାଣିବା ନେଇ ଦୁଇଟି ଗଣମାଧ୍ୟମ ଚ୍ୟାନେଲ ଏବଂ ଜଣେ ସାମ୍ବାଦିକଙ୍କ ବିରୋଧରେ ୧୦୦କୋଟିର ମାନହାନି ମାମଲା ଦାୟର ହୋଇଥିଲା । ଏହି ମାମଲାରେ ଧୋନୀଙ୍କର ବୟାନ ରେକର୍ଡ କରାଯିବ । ମାଡ୍ରାସ ହାଇକୋର୍ଟ ଏହି ମାମଲାରେ ଏକ ଶୁଣାଣି ନିର୍ଦ୍ଦେଶ ଦେଇଛନ୍ତି । ଜଷ୍ଟିସ୍ ସିଭି କାର୍ତ୍ତିକେୟନ୍ ଏଥିପାଇଁ ଜଣେ ଆଡଭୋକେଟ୍ କମିଶନରଙ୍କୁ ନିଯୁକ୍ତ କରିଛନ୍ତି । କମିଶନର ଧୋନୀଙ୍କ ତରଫରୁ ପ୍ରମାଣ ଯୋଗାଡ଼ କରିବେ । ୨୦୧୩ରେ ଆଇପିଏଲରେ ଏକ ବେଟିଂ ଦୁର୍ନୀତି ହୋଇଥିଲା । ୨୦୧୪ ମସିହାରେ ଧୋନୀ ୧୦୦ କୋଟିର ଏହି ମାନହାନି ମାମଲା ଦାୟର କରିଥିଲେ ।
ଧୋନୀ ଅଭିଯୋଗ କରିଥିଲେ ଯେ, ଆଇପିଏଲ୍ ବେଟିଂ ଦୁର୍ନୀତି ଉପରେ ଏକ ଟେଲିଭିଜନ ବିତର୍କ ସମୟରେ ତାଙ୍କ ବିରୋଧରେ ମାନହାନିଜନକ ମନ୍ତବ୍ୟ ଦିଆଯାଇଥିଲା । ଏହା ତାଙ୍କ ପ୍ରତିଛବିକୁ କ୍ଷତି ପହଞ୍ଚାଇଛି । ଦି ହିନ୍ଦୁ ରିପୋର୍ଟ ଅନୁଯାୟୀ ଧୋନୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ପିଆର ରମନ ଏକ ସତ୍ୟପାଠ ଦାଖଲ କରିଛନ୍ତି । ଫଳରେ ଏହି ମାମଲାର ଶୁଣାଣି ହେବାକୁ ଯାଉଛି।
୨୦୧୩ ଆଇପିଏଲ୍ ସ୍ପଟ୍-ଫିକ୍ସିଂ ଏବଂ ବେଟିଂ ଦୁର୍ନୀତିକୁ ଟି-୨୦ ଲିଗ୍ ଇତିହାସରେ ଏକ ବଡ ଦାଗ ବୋଲି ବିବେଚନା କରାଯାଏ । ତିନି ଜଣ କ୍ରିକେଟର ସ୍ପଟ୍-ଫିକ୍ସିଂରେ ଜଡିତ ଥିବା ଜଣାପଡିଥିଲା । ସେହି ସମୟରେ ଦୁଇଟି ଫ୍ରାଞ୍ଚାଇଜ୍ ଚେନ୍ନାଇ ସୁପର କିଙ୍ଗସ୍ ଏବଂ ରାଜସ୍ଥାନ ରୟାଲ୍ସକୁ ସେମାନଙ୍କର ଶୀର୍ଷ ଅଧିକାରୀଙ୍କ ବେଟିଂ କାର୍ଯ୍ୟକଳାପ ଯୋଗୁଁ ଦୁଇ ବର୍ଷ ପାଇଁ ନିଲମ୍ବିତ କରାଯାଇଥିଲା । ମହେନ୍ଦ୍ର ସିଂହ ଧୋନୀ ୨୦୨୦ ମସିହାରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ ମଧ୍ୟ ଏବେ ବି ଆଇପିଏଲରେ ଖେଳୁଛନ୍ତି ।
