ସମାଜ ଡିଜିଟାଲ ଡେସ୍କ: ଭାରତ ବିରୋଧୀ ସ୍ଳୋଗାନ ଦେଉଥିଲେ। ପାକିସ୍ତାନ ସମର୍ଥନରେ ନାରା ଲଗାଉଥିଲେ। କିନ୍ତୁ ଏବେ ତାଙ୍କୁ ମାସକୁ ଦୁଇଥର ତ୍ରିରଙ୍ଗାକୁ ସଲାମି(ସାଲ୍ୟୁଟ) କରିବାକୁ ପଡ଼ିବ। ଏହି ସମୟରେ ୨୧ ଥର ଲେଖାଏ ‘ଭାରତ ମାତା କୀ ଜୟ’ କହିବାକୁ ପଡ଼ିବ। ଏମିତି ଅଭିନବ ସର୍ତ୍ତରେ ମଧ୍ୟପ୍ରଦେଶ ହାଇକୋର୍ଟ ଜଣେ ଅଭିଯୁକ୍ତକୁ ଜାମିନରେ ଛାଡ଼ିଛନ୍ତି। ଏହା ସହିତ ୫୦ ଟଙ୍କା ଜରିମାନା କରିଛନ୍ତି। ମାମଲାର ଶୁଣାଣି ଶେଷ ହେବା ପର୍ଯ୍ୟନ୍ତ ପ୍ରତିମାସର ପ୍ରଥମ ଏବଂ ୪ର୍ଥ ମଙ୍ଗଳବାର ୨ ଥର ଭୋପାଳ ଥାନାକୁ ଯାଇ ସେଠାରେ ଏପରି କରିବାକୁ କୋର୍ଟ ଆଦେଶ ଦେଇଛନ୍ତି।
ବିଚାରପତି ଡି.କେ. ପାଲିଓ୍ବାଲ ଆଦେଶରେ କହିଛନ୍ତି ଯେ, କିଛି ସର୍ତ୍ତ ରଖି ଅଭିଯୁକ୍ତକୁ ଜାମିନରେ ଛଡ଼ାଯାଇପାରିବ। ଯାହାଫଳରେ ତା’ ମନରେ ଦେଶ ପ୍ରତି ଦାୟିତ୍ଵବୋଧ ଏବଂ ଗର୍ବର ଭାବନା ସୃଷ୍ଟି ହୋଇପାରିବ।
