ଡେସ୍କ: ସରକାର କହିଛନ୍ତି ଯେ ଦେଶର ସମସ୍ତ ମେଟ୍ରୋ ରେଳ ବ୍ୟବସ୍ଥାରେ ପ୍ରତିଦିନ ଏକ କୋଟିରୁ ଅଧିକ ଲୋକ ଯାତ୍ରା କରୁଛନ୍ତି ଏବଂ ଆସନ୍ତା ଦୁଇ ବର୍ଷ ମଧ୍ୟରେ ଏହି ସଂଖ୍ୟା ୧ କୋଟି ୨୫ ଲକ୍ଷକୁ ବୃଦ୍ଧି ପାଇପାରେ। ଭାରତୀୟ ମେଟ୍ରୋ ରେଳ ବ୍ୟବସ୍ଥା ବିଷୟରେ ଏକ ଆନ୍ତର୍ଜାତୀୟ ପତ୍ରିକାରେ ପ୍ରକାଶିତ ଲେଖା ପ୍ରସଙ୍ଗରେ ଗୃହ ଓ ନଗର ବ୍ୟାପାର ମନ୍ତ୍ରଣାଳୟ ଏହି ବିବୃତ୍ତି ଜାରି କରିଛି। ମନ୍ତ୍ରଣାଳୟ ଏହି ଲେଖାକୁ ବିଭ୍ରାନ୍ତିକର ବୋଲି କହି ପ୍ରତ୍ୟାଖ୍ୟାନ କରିଛି।
ମନ୍ତ୍ରଣାଳୟ କହିଛି ଯେ ୨୦୨୩ ମସିହାରେ ଦିଲ୍ଲୀ ମେଟ୍ରୋରେ ଦୈନିକ ଯାତ୍ରୀଙ୍କ ସଂଖ୍ୟା ଆକଳନଠାରୁ ବହୁତ ଅଧିକ ହୋଇଛି। ଦିଲ୍ଲୀ ମେଟ୍ରୋରେ ପ୍ରତିଦିନ ୭୦ ଲକ୍ଷରୁ ଅଧିକ ଲୋକ ଯାତ୍ରା କରୁଛନ୍ତି। ଏକ ଅଧ୍ୟୟନରୁ ଏହା ମଧ୍ୟ ଜଣାପଡିଛି ଯେ କେବଳ ବସ୍ ସେବା ମାଧ୍ୟମରେ ବୃଦ୍ଧି ପାଉଥିବା ଭିଡ ଦୂର କରିବା ସମ୍ଭବ ନୁହେଁ ତେଣୁ ଦିଲ୍ଲୀ ମେଟ୍ରୋ ଏହି ପରିସ୍ଥିତିକୁ ନିୟନ୍ତ୍ରଣ କରିବାରେ ବହୁତ ସାହାଯ୍ୟ କରିଛି।
ମନ୍ତ୍ରଣାଳୟ କହିଛି ଯେ ଭାରତରେ ସମସ୍ତ ପ୍ରକାର ସାର୍ବଜନୀନ ପରିବହନ ବ୍ୟବସ୍ଥା ଜରୁରୀ ଅଟେ। ସୁବିଧାଜନକ, ନିର୍ଭରଯୋଗ୍ୟ ଏବଂ ଦକ୍ଷ ପରିବହନ ବିକଳ୍ପ ଯୋଗାଇବାକୁ ସରକାର ପ୍ରତିବଦ୍ଧ। ନିକଟରେ ସରକାର ପ୍ରଧାନମନ୍ତ୍ରୀ ଇ-ବସ୍ ସେବା ଯୋଜନା ଆରମ୍ଭ କରିଛନ୍ତି। ପାଞ୍ଚରୁ ଚାଳିଶ ଲକ୍ଷ ଜନସଂଖ୍ୟା ବିଶିଷ୍ଟ ସହରରେ ୧୦ ହଜାର ଇ-ବସ୍ ଚଳାଚଳ କରିବ।
