ମୋହନା: ଖବର ପ୍ରକାଶନ ପରେ ଦୁର୍ଗମ ଗାଁରେ ଖନନ ହେଲା ୩ଟି ନଳକୂପ । ଗୋବିନ୍ଦପୁର ପଞ୍ଚାୟତ ଟାଙ୍ଗିଲିପଦର ଗାଁରେ ୩ଟି ନଳକୂପ ଖୋଳାଯାଇଛି । ଆଦିବାସୀ ଅଧ୍ୟୁଷିତ ଅଞ୍ଚଳର ବିକାଶ ପାଇଁ କେନ୍ଦ୍ର ଓ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ମୌଳିକ ସୁବିଧା ପାଇବାରୁ ବଞ୍ଚିତ ହେଉଛନ୍ତି ଲୋକେ । ପଞ୍ଚାୟତ ନିର୍ବାଚନ ଆସିଲେ ନେତା ମାନେ ଭୋଟ୍ ପାଇଁ ଗାଁ ଗାଁ ବୁଲନ୍ତି ହେଲେ ଗାଁରେ ସମସ୍ୟାର ସମାଧାନ କରୁନଥିବା ଲୋକମାନେ ଅଭିଯୋଗ କରିଛନ୍ତି । ମୌଳିକ ସୁବିଧା ପୂରଣ ନହେବାରୁ ଗତ ୨୦୧୭ ଫେବୃଆରୀ ୨୧ର ପଞ୍ଚାୟତ ନିର୍ବାଚନକୁ ବର୍ଜନ କରିଥିଲେ ଗ୍ରାମବାସୀ । ଗ୍ରାମର ଲୋକମାନେ ନିକଟସ୍ଥ ଜଙ୍ଗଲରୁ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ବାହାରେ ବିକ୍ରି କରି ଓ କୁଲି ମଜୁରୀ ଖଟି ପରିବାର ପ୍ରତିପୋଷଣ କରିଥାନ୍ତି । ବ୍ଳକ ଠାରୁ ୧୩ କିମି ଦୂରରେ ରହିଛି ଟାଙ୍ଗିଲିପଦର ଗ୍ରାମ। ଗାଁ ରାସ୍ତାର ଅବସ୍ଥା ଶୋଚନୀୟ ରହିଥିବା ବେଳେ, ଗାଁର ଲୋକମାନେ ନାହିଁନଥିବାର ହଇରାଣ ହେଉଛନ୍ତି ।
ଗାଁରୁ କୌଣସି ଗର୍ଭବତୀ ମହିଳା କିମ୍ଵା ଗୁରୁତର ରୋଗୀଙ୍କୁ ଡାକ୍ତରଖାନାକୁ ନେବାକୁ ଅସୁବିଧା ହେଉଛି । ଗାଁଠାରୁ ୧ କିମି ଦୂରରେ ବିଲରେ ରହିଛି ଏକ ପରିତ୍ୟକ୍ତ କୂଅ । କୂଅର ଦୂଷିତ ଗୋଳିଆ ଜଳକୁ ଲୋକେ ବାଧ୍ୟ ହୋଇ ବ୍ୟବହାର କରନ୍ତି । ଏହି ଜଳ ପିଇ ଲୋକେ ବିଭିନ୍ନ ସମୟରେ ପେଟ ରୋଗରେ ଆକ୍ରାନ୍ତ ହେଉଥିବା ନଜିର ମଧ୍ୟ ରହିଛି। ଏହି ଖବର କିଛି ଦିନ ତଳେ ପ୍ରକାଶନ ହେବାପରେ ଜଳ ବିଭାଗ ଯନ୍ତ୍ରୀ ଯାଇ ପରିସ୍ଥିତି ଅନୁଧ୍ୟାନ କରି ଫେରିବା ପରେ ସୋମବାର ଦିନ କନିଷ୍ଠ ଯନ୍ତ୍ରୀ ପଦ୍ମନାଭ ଖଣ୍ଡାଇ ଓ କର୍ମଚାରୀ ଅଶ୍ଵିନୀ କୁମାର ଡାକୁଆ ଏକ ଟ୍ରାକ୍ଟରରେ ଖଞ୍ଜାଯାଇଥିବା ବୋରୱେଲ ଗାତି ନେଇ ଟାଙ୍ଗିଲିପଦର ଗ୍ରାମରେ ୩ଟି ନଳକୂପ ଖୋଳିଥିଲେ ।
