ଲଣ୍ଡନ : ରାଜ୍ୟଗୋଷ୍ଠୀ ରାଷ୍ଟ୍ରମୁଖ୍ୟଙ୍କ ଶିଖର ସମ୍ମିଳନୀରେ ଯୋଗଦେବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲଣ୍ଡନରେ ପହଞ୍ଚିଛନ୍ତି। ସେଠାରେ ମୋଦି ବ୍ରିଟେନ ପ୍ରଧାନମନ୍ତ୍ରୀ ତେରେସା ମେ’ଙ୍କ ସହ ଭିସା, ପ୍ରବାସୀ ଓ ଆତଙ୍କବାଦ ସହ ଦ୍ୱିପାକ୍ଷିକ ପ୍ରସଙ୍ଗରେ ଆଲୋଚନା କରିଛନ୍ତି । ଏହି ଅବସରରେ ମୋଦି ଆଲବର୍ଟ ଏମ୍ବାକମେଣ୍ଟ ଗାର୍ଡେନରେ ପହଞ୍ଚି ଲିଙ୍ଗାୟତ ଦାର୍ଶନିକ ବାସାଭେଶ୍ୱରଙ୍କୁ ଶ୍ରଦ୍ଧାଞ୍ଜଳି ପ୍ରଦାନ କରିଥିଲେ। ବ୍ରିଟେନ ଯୁବରାଜ ଚାର୍ଲସ୍ ପ୍ରଧାନମନ୍ତ୍ରୀ ମୋଦିଙ୍କୁ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଇତିହାସରେ ଭାରତର ଅବଦାନ ନେଇ ଆୟୋଜିତ ଏକ ପ୍ରଦର୍ଶନୀକୁ ନିମନ୍ତ୍ରଣ କରିଥିଲେ। ମୋଦି ବ୍ରିଟେନ ଯୁବରାଜ ଚାର୍ଲସ୍ଙ୍କ ସହ ଏହି ପ୍ରଦର୍ଶନକୁ ବୁଲି ଦେଖିଥିଲେ। ଆଜିର ଦିନ ଶେଷରେ ମୋଦି ‘ଭାରତ କି ବାତ୍, ସବ୍କେ ସାଥ‘ କାର୍ଯ୍ୟକ୍ରମରେ ସେଠାରେ ଥିବା ପ୍ରବାସୀ ଭାରତୀୟଙ୍କ ସହ ବାର୍ତ୍ତାଳାପ କରିବେ। ଏହା ପୂର୍ବରୁ ସକାଳ ଜଳଖିଆରେ ମୋଦି ବ୍ରିଟେନ ପ୍ରଧାନମନ୍ତ୍ରୀ ତେରେସା ମେ’ଙ୍କୁ ଭେଟିଥିଲେ। ଏହି ସମୟରେ ପ୍ରବାସୀ ଭାରତୀୟମାନେ ମୋଦି ମୋଦି ସ୍ଲୋଗାନ ଦେଉଥିବା ଦେଖିବାକୁ ମିଳିଥିଲା।
