କଟକ, (ସ.ପ୍ର)) : ଜଣେ କୁଖ୍ୟାତ ଲୁଟିଆକୁ ଶନିବାର ଧରିବାରେ ସଫଳ ହୋଇଛି କ୍ୟାଣ୍ଟନମେଣ୍ଟ ପୁଲିସ। ଅଭିଯୁକ୍ତ ଜଣକହେଲା ଲାଲବାଗ ଥାନା ଅନ୍ତର୍ଗତ ଜଗନ୍ନାଥ ବଲ୍ଲଭ ଅଞ୍ଚଳର ଶକ୍ତି ଆଚାର୍ଯ୍ୟ ଓରଫ ବଣ୍ଟି। ତା’ ନିକଟରୁ ୨୫ଟି ଦାମୀ ମୋବାଇଲ, ନଗଦ ଟଙ୍କା ଜବତ କରାଯାଇଥିବା ଥାନା ଅଧିକାରୀ ଦୀନକୃଷ୍ଣ ମିଶ୍ର କହିଛନ୍ତି।
କ୍ୟାଣ୍ଟନମେଣ୍ଟ ଅଞ୍ଚଳରେ ରହୁଥିବା ସଚ୍ଚିକାନ୍ତ ବିଶ୍ୱାଳ ଶୁକ୍ରବାର ରାତି ପ୍ରାୟ ୮ଟାରେ ନିଜର କାର୍ଯ୍ୟସ୍ଥଳରୁ ଘରକୁ ଫେରୁଥିଲେ। ଦୟାଶ୍ରମ ନିକଟରେ ଜଣେ ଦୁର୍ବୃତ୍ତ ତାଙ୍କୁ ଅଟକାଇ ମୋବାଇଲ ଫୋନ ଝାମ୍ପି ନେଇଥିଲା। ଏ ନେଇ ସଚ୍ଚିକାନ୍ତ କ୍ୟାଣ୍ଟନମେଣ୍ଟ ଥାନାରେ ଏତଲା ଦେଇଥିଲେ। ପାଖରେ ଲାଗିଥିବା ସିସିଟିଭି ଚିତ୍ର ଓ କିଛି ପ୍ରତ୍ୟକ୍ଷଦର୍ଶୀଙ୍କ ସୂଚନା ଆଧାରରେ ଅଭିଯୁକ୍ତ ବଣ୍ଟିକୁ ପୁଲିସ ଚିହ୍ନଟ କରିବାରେ ସକ୍ଷମ ହୋଇଥିଲା। ଥାନାଧିକାରୀ ଶ୍ରୀ ମିଶ୍ରଙ୍କ ନେତୃତ୍ୱରେ ପୁଲିସ ଦଳ ଜଗନ୍ନାଥ ବଲ୍ଲଭସ୍ଥିତ ଘରେ ଚଢ଼ଉ କରି ବଣ୍ଟିକୁ ଗିରଫ କରିଥିଲେ। ଜେରା କରିବା ପରେ ସେ ଜଣେ କୁଖ୍ୟାତ ଲୁଟିଆ ହୋଇଥିବା ଜଣାପଡିଥିଲା। ନିର୍ଜନ ସ୍ଥାନରେ ସୁଯୋଗ ଦେଖି ବାଇକ ଚାଳକ ଓ ପଥଚାରୀଙ୍କୁ ଅଟକାଇ ମୋବାଇଲ ଲୁଟିନେବାରେ ସଫଳ ହୋଇଥାଏ ବୋଲି କହିଥିଲା। ସୂଚନା ଅନୁଯାୟୀ ପୁଲିସ ତା’ ଘରୁ ବିଭିନ୍ନ ନାମୀଦାମୀ କମ୍ପାନୀର ୨୫ଟି ମୋବାଇଲ ଫୋନ ଜବତ କରିଛି। ଅଭିଯୁକ୍ତକୁ ଅଦାଲତ ଚାଲାଣ ପରେ କାରାଗାରକୁ ପଠାଇ ଦିଆଯାଇଛି।
Comments are closed.