ସୋରଡ଼ା: ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ଦଶମ ଶ୍ରେଣୀ (ମାଟ୍ରିକ) ଶ୍ରେଣୀଗୃହ ପରୀକ୍ଷାରେ ୬୮ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହୋଇଛନ୍ତି ସୋରଡ଼ା ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁ। ରାଜ୍ୟରେ ଜୁଲାଇ ମାସରେ ଶ୍ରେଣୀ ଗୃହରେ ଦଶମ ପରୀକ୍ଷା ଅନୁଷ୍ଠିତ ହୋଇଥିଲା। ସୋରଡ଼ା ବିଧାୟକ ପୂର୍ଣ୍ଣଚନ୍ଦ୍ର ସ୍ୱାଇଁ ମଧ୍ୟ ସୋରଡ଼ା ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଛାତ୍ରଛାତ୍ରୀଙ୍କ ସହ ପରୀକ୍ଷା ଦେଇଥିଲେ। ୫ ଗୋଟି ବିଷୟରେ ମୋଟ ୫୦୦ ନମ୍ବର ମଧ୍ୟରୁ ୩୪୦ ନମ୍ବର ଅର୍ଥାତ୍ ୬୮ ପ୍ରତିଶତ ରଖି ବି-୨ ଗ୍ରେଡରେ ଉତ୍ତୀର୍ଣ୍ଣ ହୋଇଛନ୍ତି।
ପରୀକ୍ଷା ଫଳ ନେଇ ଖୁସି ଥିବା ସହିତ ଉଚ୍ଚ ଶିକ୍ଷା ଜାରି ରହିବ ବୋଲି ବିଧାୟକ ତାଙ୍କ ପ୍ରତିକ୍ରିୟାରେ ପ୍ରକାଶ କରିଛନ୍ତି। ସୂଚନାଯୋଗ୍ୟଯେ, ଲଗାତାର ତିନିଥର ବିଧାୟକ ନିର୍ବାଚିତ ପୂର୍ଣ୍ଣଚନ୍ଦ୍ର ୨୦୦୯ରୁ ୨୦୧୯ ସାଧାରଣ ନିର୍ବାଚନ ବେଳେ ପ୍ରାର୍ଥୀପତ୍ର ଦାଖଲ ସମୟରେ ଦେଇଥିବା ସତ୍ୟପାଠରେ ଭିନ୍ନଭିନ୍ନ ଶିକ୍ଷାଗତ ଯୋଗ୍ୟତା ଦର୍ଶାଇଥିଲେ। ଯାହାକୁ ନେଇ ବିରୋଧୀ ତାଙ୍କ ବିରୋଧରେ ନିର୍ବାଚନ ଆୟୋଗଙ୍କଠାରେ ଫେରାଦ ହୋଇଥିଲେ। ୨୦୦୯ ନିର୍ବାଚନରେ ମାଟ୍ରିକ, ୨୦୧୪ରେ ୯ମ ଏବଂ ୨୦୧୯ ନିର୍ବାଚନରେ ମଧ୍ୟ ସେ ନବମ ଶ୍ରେଣୀ ପାଠ ପଢିଥିବା ସତ୍ୟପାଠରେ ଦର୍ଶାଇଥିଲେ।
