ସମ୍ବଲପୁର : ତାମିଲନାଡୁର ଯୁବ ବ୍ୟାପାର ଓ କ୍ରିଡା ମନ୍ତ୍ରୀ ଉଦୟନିଧି ଷ୍ଟାଲିନ ଗତ ୨ ତାରିଖରେ ସନାତନ ଧର୍ମକୁ ଡେଙ୍ଗୁ, ମ୍ୟାଲେରିଆ ଓ କରୋନା ଭୂତାଣୁ ସଂକ୍ରମିତ ସହିତ ସମାନ କହି ସନାତନ ଧର୍ମକୁ ମୁଳୋତ୍ପାଟନ କରିବା ପାଇଁ ଆହ୍ୱାନ ଦେଇଥିଲେ । ଏହାକୁ ଶ୍ରୀ ବ୍ରହ୍ମ ମଣ୍ଡପ ପଣ୍ଡିତ ମହାସଭା ସମ୍ବଲପୁର ପକ୍ଷରୁ ତୀବ୍ର ବିରୋଧ କରାଯାଇ ରାଷ୍ଟ୍ରପତିଙ୍କୁ ଏକ ଦାବିପତ୍ର ଦେଇ ଉଦୟନିଧିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରାଯାଇଛି । ସୋମବାର ସମ୍ବଲପୁର ଜିଲାପାଳଙ୍କ ଜରିଆରେ ରାଷ୍ଟ୍ରପତିଙ୍କୁ ଦିଆଯାଇଥିବା ଦାବିପତ୍ର ଅନୁଯାୟୀ, ଉଦୟନିଧିଙ୍କ ମନ୍ତବ୍ୟ ସମ୍ବିଧାନର ଧାରା ୨୫ ଓ ୨୬କୁ ଅବମାନନା କରୁଛି। ଏହି ମନ୍ତବ୍ୟ ସାମାଜିକ ଗରମାଧ୍ୟମରେ ପ୍ରଚାର ହେବା ଦ୍ୱାରା ସନାତନୀ ହିନ୍ଦୁ ସମାଜର ଧାର୍ମିକ ଭାବନାକୁ ଘୋର ଆଘାତ ସହିତ ମାନସିକ ଯନ୍ତ୍ରଣା ଦେଇଛି । ଏଭଳି ମନ୍ତବ୍ୟ ଦେଇଥିବା ବ୍ୟକ୍ତି ବିଶେଷ ବିରୋଧରେ ହିନ୍ଦୁ ଧର୍ମ ଆଇନ ଅନୁଯାୟୀ ଦୃଷ୍ଟାନ୍ତ ମୂଳକ କଠୋର ଦଣ୍ଡ ବିଧାନ କରାଯାଉ । ଏଥି ସହ ଧର୍ମ ଓ ଦେଶର ଏକତା ଓ ଅଖଣ୍ଡତା ପ୍ରତି ବିପଦ ସୃଷ୍ଟି ଭଳି ମନ୍ତବ୍ୟ ଦେଇଥିବାରୁ ଦେଶଦ୍ରୋହ ମାମଲା ରୁଜୁ କରାଯାଉ, ଯାହା ଫଳରେ ଆଗାମୀ ଦିନରେ କୌଣସି ବ୍ୟକ୍ତି ବିଶେଷ ଏପରି ମନ୍ତବ୍ୟ ଦେବାରୁ ବିରତ ରହିବେ ବୋଲି ଶ୍ରୀ ବ୍ରହ୍ମ ମଣ୍ଡପ ପଣ୍ଡିତ ମହାସଭା ସମ୍ବଲପୁର ତରଫରୁ ଦାବି କରାଯାଇଛି । ଦାବିପତ୍ର ପ୍ରଦାନ ସମୟରେ ସଭାପତି ରବି ନାରାୟଣ ପଣ୍ଡା, କାଳିଦାସ ପଣ୍ଡା, ଲକ୍ଷ୍ମଣ କୁମାର ବେହେରା, ଗିରିଜା ଶଙ୍କର ପଣ୍ଡା, କାହ୍ନୁଚରଣ ଷଡଙ୍ଗୀ, ଜିତେନ୍ଦ୍ର କୁମାର ନନ୍ଦ, ମନବୋଧ ପାଢ଼ୀ, ସୁରିତ ପାଢ଼ୀ, ରାକେଶ ମିଶ୍ର, ଶଶିଭୂଷଣ ବ୍ରହ୍ମଚାରୀ, ସୁବ୍ରତ ପୁରୋହିତ, ଆଲୋକ ପଣ୍ଡା, ଉତ୍ତମ ରଥ, ରମେଶ ପୁରୋହିତ ଙ୍କ ସମେତ ୨୦ରୁ ଅଧିକ ପଣ୍ଡିତ ଓ ସଦସ୍ୟ ଉପସ୍ଥିତ ରହିଥିଲେ।
Comments are closed.