ମୁମ୍ବଇ: ବକ୍ସଅଫିସରେ ଦୁଇଟି ବଲିଉଡ଼ ଚଳଚ୍ଚିତ୍ର ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଛି। ରାଣୀ ମୁଖାର୍ଜୀଙ୍କ ‘ମର୍ଦ୍ଦାନୀ-୨’ ଏବଂ ଇମ୍ରାନ୍ ହାସମୀ ଓ ଋଷୀ କପୁରଙ୍କ ‘ଦି ବଡି’ ଶୁକ୍ରବାର ପରଦାକୁ ଆସିଛି। ତେବେ ପ୍ରଥମ ଦିନରେ କିଏ କେତେ ଆୟ କରିବ ସେ ନେଇ ସମୀକ୍ଷକମାନେ ଆକଳନ କରିଛନ୍ତି। ଆସନ୍ତୁ ଜାଣିବା ସେ ବିଷୟରେ-
ଦୁଇଟି ଯାକ ଚଳଚ୍ଚିତ୍ରର କାହାଣୀ ପରସ୍ପରଠାରୁ ସମ୍ପୂର୍ଣ୍ଣ ଭିନ୍ନ। ସୂଚନା ଅନୁସାରେ, ‘ମର୍ଦ୍ଦାନୀ-୨’ ମୁକ୍ତିଲାଭର ପ୍ରଥମ ଦିନରେ ପ୍ରାୟ ୪.୭୫ କୋଟି ଟଙ୍କା ଆୟ କରିବ ବୋଲି ଆଶା କରାଯାଉଛି। ଚଳଚ୍ଚିତ୍ରର ବଜେଟ୍ ୨୦ କୋଟି ଟଙ୍କା ରହିଛି। ଚଳିତ ଦିନରେ ଦେଶରେ ବୃଦ୍ଧି ପାଉଥିବା ବଳାତ୍କାର ଘଟଣାକୁ ନେଇ ଲୋକଙ୍କ ମଧ୍ୟରେ ଆକ୍ରୋଶ ଦେଖିବାକୁ ମିଳିଛି। ତେବେ ଏହି ସମୟରେ ମୁକ୍ତିଲାଭ କରିଥିବା ‘ମର୍ଦ୍ଦାନୀ-୨’କୁ ଲୋକେ ପସନ୍ଦ କରିପାରନ୍ତି ବୋଲି କୁହାଯାଉଛି। ଆଦିତ୍ୟ ଚୋପ୍ରାଙ୍କ ପ୍ରଯୋଜନାରେ ନିର୍ମିତ ଏହି ଚଳଚ୍ଚିତ୍ରର ନିର୍ଦ୍ଦେଶନା ଭାର ଗୋପୀ ପୁଥରନ ବହନ କରିଛନ୍ତି।
ଅପରପକ୍ଷରେ ‘ଦି ବଡି’ ପ୍ରଥମ ଦିନରେ ପ୍ରାୟ ୧.୨୦ କୋଟି ଟଙ୍କା ଆୟ କରିବ ବୋଲି ଆଶା ରହିଛି। ଚଳଚ୍ଚିତ୍ରର ବଜେଟ୍ ୩୦ କୋଟି ରହିଛି। ଚଳଚ୍ଚିତ୍ରର ଟ୍ରେଲରକୁ ଲୋକେ ଖୁବ୍ ପସନ୍ଦ କରିଥିଲେ। ଚଳଚ୍ଚିତ୍ରରେ ଇମ୍ରାନ୍ ହାସମୀ ଓ ଋଷୀ କପୁରଙ୍କ ବ୍ୟତୀତ ସୋଭିତା ଧୁଲିପାଲା, ବେଦିକା ଓ ରୁକ୍ସାର ରହମାନ ପ୍ରମୁଖ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି। ଜିତୁ ଜୋଶେଫ୍ ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି।
ପୂର୍ବରୁ ବକ୍ସ ଅଫିସରେ ‘ପତି ପତ୍ନୀ ଔର୍ ୱୋ’ ଏବଂ ‘ପାନିପତ୍’ ମଧ୍ୟ ରହିଛି। ଏହି ଦୁଇ ଚଳଚ୍ଚିତ୍ର କାରଣରୁ ‘ଦି ବଡି’ ଓ ‘ମର୍ଦ୍ଦାନୀ-୨’ର ଆୟ କେତେ ପ୍ରଭାବିତ ହେଉଛି ତାହା ଦେଖିବା ବାକି ରହିଲା।
