ଆସନ୍ତା ମାସ ଅର୍ଥାତ୍ ଅଗଷ୍ଟ ତୃତୀୟ ସପ୍ତାହ ବେଳକୁ ସଂସଦର ମୌସୁମୀ ଅଧିବେଶନ ବସିପାରେ । ବିଶ୍ବସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ ଏହି ବୈଠକ କିପରି ବସିବ ତାହାକୁ ନେଇ ବାଚସ୍ପତି ଓମ୍ ବିର୍ଲା ପ୍ରସ୍ତୁତି ଆରମ୍ଭ କରିଛନ୍ତି । ସାମାଜିକ ଦୂରତ୍ବ, ମାସ୍କ ପରିଧାନ ପରି କୋବିଦ ମାର୍ଗଦର୍ଶିକାରେ ବୈଠକ ବସିବ ନା ଭିଡ଼ିଓ କନଫରେନ୍ସରେ ଭର୍ଚୁଆଲ ଅଧିବେଶନ ହେବ ସେ ସମ୍ପର୍କରେ ବିଚାରବିମର୍ଷ ଆରମ୍ଭ ହୋଇଛି ।
ସର୍ବନିମ୍ନ ଆବଶ୍ୟକ ସାଂସଦଙ୍କୁ ନେଇ ସଂସଦ କାର୍ଯ୍ୟ ଆହ୍ବାନ କରାଯିବାର ସମ୍ଭାବନା ରହିଛି । ସାମାଜିକ ଦୂରତ୍ବ ପାଳନ ସହ ଦର୍ଶକଙ୍କୁ ପ୍ରବେଶ ଅନୁମତି ଦିଆଯାଇ ନ ପାରେ ବୋଲି ସୂଚନା ମିଳିଛି ।
ଦେଶରେ କରୋନା ସ୍ଥିତି ଓ ଏହାର ମୁକାବିଲା ନେଇ ନିଆଯାଇଥିବା ପଦକ୍ଷେପ, ପ୍ରକୃତ ନିୟନ୍ତ୍ରଣ ରେଖାରେ ଭାରତ-ଚୀନ୍ ମଧ୍ୟରେ ସୃଷ୍ଟ ଉତ୍ତେଜନା ଓ ଦୁଇ ଦେଶର ଯବାନଙ୍କ ମଧ୍ୟରେ ହିଂସ୍ର ଲଢ଼େଇ ଆଦି ନେଇ ବୈଠକରେ ଆଲୋଚନା ହେବାର ସମ୍ଭାବନା ରହିଛି ।
ଭାରତୀୟ ସମ୍ବିଧାନର ବ୍ୟବସ୍ଥା ଅନୁସାରେ ସଂସଦର ଦୁଇଟି ଅଧିବେଶନ ୬ ମାସ ମଧ୍ୟରେ ବସିବା ଅନିବାର୍ଯ୍ୟ । ତେଣୁ ଅଗଷ୍ଟ ତୃତୀୟ ସପ୍ତାହ ବେଳକୁ ଅଧିବେଶନ ହେବା ନେଇ ଚର୍ଚା ଚାଲିଛି । ଏହି ଅଧିବେଶନରେ କେତେକ ଗୁରୁତ୍ବପୂର୍ଣ ପ୍ରସଙ୍ଗ ନେଇ ବିଲ୍ ଉପସ୍ଥାପନ ହେବ ବୋଲି ସୂଚନା ମିଳିଛି ।
