ଅବକାରୀ ମାମଲା, ଏପ୍ରିଲ ୫ ଯାଏଁ ସିସୋଦିଆଙ୍କୁ ଜେଲ ପଠାଇଲେ କୋର୍ଟ

ଡେସ୍କ: ଅବକାରୀ ନୀତି ସମେତ ଅନ୍ୟ କେତେକ ମାମଲାରେ ଜଡିତ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ ଏବେ ଜେଲରେ ଥିବା ବେଳେ ଆଜି ରୋଜ ଆଭିନିଉ କୋର୍ଟ ଏକ ଅର୍ଥ ଠକେଇ ମାମଲାରେ ତାଙ୍କୁ ଆସନ୍ତା ମାସ ୫ ତାରିଖ ପର୍ଯ୍ୟନ୍ତ ଜେଲକୁ ପଠାଇଛନ୍ତି। ପୂର୍ବରୁ ଦିଆଯାଇଥିବା ହାଜତ ମିଆଦ ଆଜି ଶେଷ ହେଉଥିବା ବେଳେ ପ୍ରବର୍ତ୍ତନ ନିର୍ଦ୍ଦେଶାଳୟ ସିସୋଦିଆଙ୍କୁ କୋର୍ଟରେ ହାଜର କରାଇଥିଲା। ଇଡି ଆଜି ନିଜ ହେପାଜତକୁ ନେବା ପାଇଁ ଆବେଦନ କରିନଥିଲା ତେଣୁ କୋର୍ଟ ତାଙ୍କୁ ନ୍ୟାୟିକ ହେପାଜତକୁ ପଠାଇଥିଲେ।

ଆଜି ଜବାବ ସୁଆଲ ସମୟରେ ଶ୍ରୀ ସିସୋଦିଆ ଜେଲରେ ନିଜ ପାଖରେ ଧର୍ମଗ୍ରନ୍ଥ ରଖିବାକୁ ଚାହିଁଥିଲେ ଓ କୋର୍ଟ ତାଙ୍କୁ ଏ ନେଇ ଆବେଦନ କରିବାକୁ କହିଥିଲେ। ପ୍ରଥମେ ଦିଲ୍ଲୀ ମଦ ନୀତି ମାମଲାରେ ସିସୋଦିଆଙ୍କୁ ସିବିଆଇ ଚଳିତ ବର୍ଷ ଫେବୃଆରୀ ୨୬ରେ ଗିରଫ କରିବା ପରେ ତିହାର ଜେଲରେ ପ୍ରବର୍ତ୍ତନ ନିର୍ଦ୍ଦେଶାଳୟ ତାଙ୍କୁ ମାର୍ଚ୍ଚ ୯ରେ ଗିରଫ କରିଥିଲା।