ନୂଆଦିଲ୍ଲୀ : ଅବକାରୀ ନୀତି ପ୍ରଣୟନ କ୍ଷେତ୍ରରେ ଅନିୟମିତତା ଅଭିଯୋଗରେ ଗିରଫ ହୋଇଥିବା ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ୫ଦିନ ପାଇଁ ସିବିଆଇ ହାଜତକୁ ପଠାଇ ଦିଆଯାଇଛି । ରବିବାର ସନ୍ଧ୍ୟାରେ ଗିରଫ ହୋଇଥିବା ସିସୋଦିଆଙ୍କୁ ସୋମବାର କଡା ସୁରକ୍ଷା ବ୍ୟବସ୍ଥା ମଧ୍ୟରେ ରୌଜ ଆଭେନ୍ୟୁ କୋର୍ଟରେ ହାଜର କରାଯାଇଥିଲା। ସିବିଆଇର ଆବେଦନକ୍ରମେ ଅଦାଲତ ତାଙ୍କୁ ୫ଦିନ ପାଇଁ ହାଜତକୁ ପଠାଇ ଦେଇଛନ୍ତି। ଅଦାଲତଙ୍କ ନିର୍ଦେଶ ପରେ ତାଙ୍କୁ ସିବିଆଇ ମୁଖ୍ୟାଳୟକୁ ନିଆଯାଇଥିଲା। ସେଠାରେ ସେ ମାର୍ଚ୍ଚ ୪ ତାରିଖ ପର୍ଯ୍ୟନ୍ତ ରହିବେ। ସିବିଆଇର ଅଭିଯୋଗ ଅନୁଯାୟୀ ସିସୋଦିଆ ମଦ ବ୍ୟବସାୟୀଙ୍କୁ ଲାଭ ପହଞ୍ଚାଇବା ଲାଗି ଅବକାରୀ ନୀତିରେ ପରିବର୍ତ୍ତନ କରିଥିଲେ। ଅବକାରୀ ନୀତିରେ ଯେଉଁ ପରିବର୍ତ୍ତନ ଆଣିଥିଲେ ତା’ ଉପରେ ଉପରାଜ୍ୟପାଳଙ୍କୁ ଅନୁମୋଦନ ନିଆଯାଇଥିଲା। ଅବକାରୀ ନୀତିରେ ପରିବର୍ତ୍ତନ ପୂର୍ବକ ସିସୋଦିଆ ମଦ ବ୍ୟବସାୟୀଙ୍କୁ ୧୪୩.୪୬ କୋଟି ଟଙ୍କା ଛାଡ କରି ଦେଇଥିଲେ। ସେହିପରି ଅନେକ ଅସଫଳ ବ୍ୟବସାୟୀଙ୍କ ଲାଇସେନ୍ସ ଅର୍ଥକୁ ଫେରସ୍ତ କରିଦେଇଥିଲେ। ଯାହା ସରକାରୀ ରାଜସ୍ବକୁ ବ୍ୟାପକ କ୍ଷତି ପହଞ୍ଚାଇଥିଲା। ସିବିଆଇ ଆହୁରି କହିଛି ଯେ ରବିବାର ଜେରା ସମୟରେ ସିସୋଦିଆ ଅନେକ ପ୍ରଶ୍ନକୁ ଏଡାଇ ଯାଇଥିଲେ। ଆଉ କେତେକ ଉତ୍ତର ସନ୍ତୋଷଜନକ ନଥିଲା। ଅନ୍ୟପଟେ ସିସୋଦିଆଙ୍କ ଗିରଫକୁ ବିରୋଧ କରି ସୋମବାର ଆମ୍ ଆଦମୀ ପାର୍ଟି (ଆପ୍) ପକ୍ଷରୁ ଦେଶବ୍ୟାପୀ ବିକ୍ଷୋଭ ପ୍ରଦର୍ଶନ କରାଯାଇଥିଲା। ମୁମ୍ବଇରେ ଆପ୍ର ବିକ୍ଷୋଭ ସମୟରେ ଦଳର ଆଞ୍ଚଳିକ ମୁଖିଆ ପ୍ରୀତି ଶର୍ମା ମେନନଙ୍କୁ ପୁଲିସ ଅଟକ ରଖିଥିଲା। ସେହିପରି ଦିଲ୍ଲୀରେ ବିକ୍ଷୋଭ ପ୍ରଦର୍ଶନ ବେଳେ ପୁଲିସ ସହିତ ଆପ୍ କର୍ମୀଙ୍କ ସଂଘର୍ଷ ହୋଇଥିଲା।
Comments are closed.