ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନରେ ଭୋଟ ଗଣତି ଜାରି ରହିଥିବାବେଳେ ଆମ୍ ଆଦ୍ମୀ ପାର୍ଟି(ଆପ୍) ସୁବିଧାଜନକ ସ୍ଥିତିରେ ରହିଛି। ଦଳ ୫୮ ଆସନରେ ଆଗୁଆ ରହିଛି ଦିଲ୍ଲୀରେ ହାଟ୍ରିକ ମାରିବ ବୋଲି ଏକ ପ୍ରକାର ସ୍ପଷ୍ଟ ଜଣାପଡୁଛି। କିନ୍ତୁ ଏହା ସତ୍ବେ ଦଳକୁ କିଛିଟା ଝଟ୍କା ଲାଗିପାରେ ବୋଲି ଚର୍ଚ୍ଚା ହେଉଛି। କାରଣ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିଶୋଦିଆ ପତପରଗଞ୍ଜ ଆସନରେ ପଛୁଆ ରହିଛନ୍ତି। ସେ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀ ବିଜେପିର ରବୀନ୍ଦ୍ର କୁମାର ନେଗୀଙ୍କଠାରୁ ପ୍ରାୟ ୧୫୦୦ ଭୋଟ ଦୂରରେ ରହିଛନ୍ତି। ସିଶୋଦିଆ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଡାହାଣ ହାତ ଭାବେ ଜଣାଶୁଣା। ସେ ଯଦି ନିର୍ବାଚନରେ ପରାଜିତ ହୁଅନ୍ତି, ତେବେ କେଜ୍ରିୱାଲ ଏବଂ ଦଳକୁ କିଛିଟା ଝଟ୍କା ମିଳିବ ବୋଲି ଆଲୋଚନା ହେଉଛି।
ଏହାବ୍ୟତୀତ ଆପ୍ର ଅନ୍ୟ କିଛି ନେତା ମଧ୍ୟ ପଛରେ ରହିଛନ୍ତି। ସକୁର ବସ୍ତି ଆସନରେ ଆପ୍ ପ୍ରାର୍ଥୀ ସତ୍ୟେନ୍ଦ୍ର ଜୈନ, କଲକାଜି ଆସନରେ ଆପ୍ର ଅତିଶି ଏବଂ ଶାହିନବାଗ ଅଞ୍ଚଳ ଆସୁଥିବା ଓଖଲା ଆସନରେ ଆପ୍ ପ୍ରାର୍ଥୀ ଅମାନତୁଲ୍ଲା ନିକଟତମ ପ୍ରତିଦ୍ବନ୍ଦ୍ବୀମାନଙ୍କଠାରୁ ପଛୁଆ ଅଛନ୍ତି। ସେହିପରି ଆପ୍ ଛାଡ଼ି ବିଜେପିରେ ସାମିଲ ହୋଇଥିବା କପିଲ ମିଶ୍ରା ମଡେଲ ଟାଉନ ଆସନରେ ଏବଂ କଂଗ୍ରେସରେ ଯୋଗଦେଇଥିବା ଅଳକା ଲାମ୍ବା ଚାନ୍ଦନୀଚୌକ ଆସନରେ ପଛରେ ପଡ଼ିଛନ୍ତି।
