ତିଗିରିଆ : ନଡିଆ ଗଛରେ ଚଢି ନଡ଼ିଆ ତୋଳିବା ହେଲା କାଳ। ଗଛ ଉପରେ ଚାଲିଗଲା ଜୀବନ। ଏଭଳି ଏକ ଅଭାବନୀୟ ଘଟଣା ଘଟିଛି ତିଗିରିଆ ଥାନା ଅନ୍ତର୍ଗତ ପାଞ୍ଚଗାଁ ଗ୍ରାମରେ। ସୂଚନା ଅନୁଯାୟୀ ପାଞ୍ଚଗାଁର ରାଜକିଶୋର ପ୍ରଧାନ (୫୫)ନଡ଼ିଆ ତୋଳିବା ପାଇଁ ସ୍ଥାନୀୟ ସାଇ ମନ୍ଦିର ନିକଟରେ ଥିବା ନଡ଼ିଆ ଗଛରେ ଚଢିଥିଲେ। ତେବେ ନଡ଼ିଆ ତୋଳି ସାରିବା ପରେ ରାଜକିଶୋର ଆଉ ଓହ୍ଲାଇ ନଥିଲେ। ଗଛ ଉପରେ ବସି ରହିଥିଲେ। ତେବେ ଏନେଇ ସ୍ଥାନୀୟ ଲୋକେ ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ ବିଭାଗର କର୍ମଚାରୀ ଘଟଣା ସ୍ଥଳରେ ପହଞ୍ଚି ଦୀର୍ଘ ସମୟ ଧରି ଅକ୍ଲାନ୍ତ ପରିଶ୍ରମ କରିବା ପରେ ରାଜକିଶୋରଙ୍କୁ ଉଦ୍ଧାର କରି ରସି ସାହାଯ୍ୟରେ ତଳକୁ ଆଣିଥିଲେ। ମାତ୍ର ତାଙ୍କର ଅବସ୍ଥା ସଂକଟାପନ୍ନ ଥିବାରୁ ପରିବାର ଲୋକେ ଚିକିତ୍ସା ପାଇଁ ୧୦୮ ଆମ୍ବୁଲାନ୍ସ ଯୋଗେ ଆଠଗଡ଼ ଉପଖଣ୍ଡ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତାଙ୍କର ମୃତ୍ୟୁ ହୃଦଘାତ ଯୋଗୁ ହୋଇଥିବ ସନ୍ଦେହ କରାଯାଉଛି। ଅପରାହ୍ନରେ ଗ୍ରାମ୍ୟ ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ଏହି ଦୁଃଖଦ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଗଭୀର ଶୋକ ପ୍ରକାଶ ପାଇଛି।
Comments are closed.