ସମାଜ ଡିଜିଟାଲ ଡେସ୍କ: ଅମାନିଆ ଚାଳକଙ୍କ ପାଇଁ ଟ୍ରାଫିକ ସମସ୍ୟା ଉପୁଜେ। ଏହି କାରଣରୁ ବେଳେବେଳେ କିଛି ଲୋକଙ୍କୁ ଜୀବନ ବି ହରାଇବାକୁ ପଡ଼େ। ଏମିତି ଏକ ଘଟଣାରେ ଜଣେ ପର୍ଯ୍ୟଟକଙ୍କୁ ଜୀବନ ହାରିବାକୁ ପଡ଼ିଛି। ହୃଦଘାତ ପରେ ରୋଗୀଙ୍କୁ ଡାକ୍ତରଖାନା ନିଆଯିବା ସମୟରେ ଟ୍ରାଫିକ ସମସ୍ୟାରେ ଫସିଯିବାରୁ ତାଙ୍କର ମୃତ୍ୟୁ ଘଟିଛି। ଡେରାଡୁନର ମସୁରିରେ ଏଭଳି ଏକ ଦୁଃଖଦ ଘଟଣା ସାମ୍ନାକୁ ଆସିଛି।
ଦିଲ୍ଲୀର ୬୨ ବର୍ଷୀୟ କମଲ କୁମାର ଟଣ୍ଡନ ଡେରାଡୁନର ମସୁରିସ୍ଥିତ ପୈତୃକ ଗ୍ରାମକୁ ଯାଇଥିଲେ। ମସୁରିର ଲାଇବ୍ରେରି ଛକରେ ତାଙ୍କ ପରିବାର ରୁହନ୍ତି। ସେଠାରେ ଗୁରୁବାର ସନ୍ଧ୍ୟା ପ୍ରାୟ ୭ଟାରେ ତାଙ୍କୁ ହୃଦଘାତ ହୋଇଥିଲା। ପରିବାର ଲୋକେ ଆମ୍ବୁଲାନ୍ସକୁ ଫୋନ କରିଥିଲେ। କିନ୍ତୁ ଆମ୍ବୁଲାନ୍ସ ୨/୩ ଘଣ୍ଟା ପରେ ପହଞ୍ଚିବ ବୋଲି କହିବାରୁ ସେମାନେ ନିଜ କାରରେ କମଲଙ୍କୁ ଡାକ୍ତରଖାନା ନେବାକୁ ଉଦ୍ୟମ କରିଥିଲେ। ଲାଇବ୍ରେରୀ ଛକ ନିକଟରେ ଟ୍ରାଫିକ ସମସ୍ୟା ଯୋଗୁ ଗାଡ଼ି ଆଗକୁ ଯାଇପାରି ନ ଥିଲା। ପୁଲିସ ଏସକର୍ଟ ଯୋଗାଇ ଦେଇଥିଲେ ବି ୪ କିଲୋମିଟର ରାସ୍ତା ଅତିକ୍ରମ କରିବାକୁ ୧ ଘଣ୍ଟାରୁ ଅଧିକ ସମୟ ଚାଲିଯାଇଥିଲା। ଯାହାଫଳରେ ଡାକ୍ତରଖାନାରେ ପହଞ୍ଚିବା ଆଗରୁ କାର୍ ଭିତରେ ହିଁ କମଲଙ୍କ ଜୀବନ ଚାଲିଯାଇଥିଲା।
କମଲଙ୍କ ପୁତୁରା ଅର୍ଜୁନ କହିଛନ୍ତି ଯେ, କେବଳ ଟ୍ରାଫିକ ସମସ୍ୟା ଯୋଗୁ ତାଙ୍କ ଦାଦା ଠିକ୍ ସମୟରେ ଡାକ୍ତରଖାନାରେ ପହଞ୍ଚିପାରିଲେ ନାହିଁ। ଯାହାଫଳରେ ତାଙ୍କର ମୃତ୍ୟୁ ଘଟିଲା। ଆମ୍ବୁଲାନ୍ସ ବି ମିଳିଲାନି। ରାସ୍ତାରେ ଲୋକମାନେ ମନଇଚ୍ଛା ଗାଡ଼ି ଚାଳନା କରୁଛନ୍ତି, ଯାହା ଫଳରେ ଟ୍ରାଫିକ ସମସ୍ୟା ସୃଷ୍ଟି ହୋଇଥିଲା। ଏହି ଘଟଣାକୁ ନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି।
