କଣ୍ଟାବାଞ୍ଜି: କଣ୍ଟାବାଞ୍ଜି ରେଲୱେ ଷ୍ଟେସନ ଏକ ନମ୍ବର ପ୍ଲାଟଫର୍ମରେ ଅପରାହ୍ନ ୩ଟା ୫୦ମିନିଟ ସମୟରେ ସୁପରଫାଷ୍ଟ ସମତା ଏକ୍ସପ୍ରେସ୍ର ଟ୍ରେନରେ ଚଢ଼ିବା ବେଳେ ଖସିପଡ଼ି ଜଣେ ଯାତ୍ରୀଙ୍କ ମୃତ୍ୟୁ ଘଟିଛି। ଟ୍ରେନଟି ପ୍ଲାଟଫର୍ମ ଛାଡୁଥିବା ସମୟରେ ଯାତ୍ରୀ ଜଣକ ପାଣି ବୋତଲ କିଣି ଟ୍ରେନ ବଗି ରେଲିଂ ଧରି ଚଢ଼ିବାକୁ ଉଦ୍ୟମ କରିବାବେଳେ ହାତ ଖସିଯିବାରୁ ଚକ ତଳେ ପଡିଯାଇଥିଲେ। ଫଳରେ ଯାତ୍ରୀଙ୍କ ବେକ କଟି ମୁଣ୍ଡ ଗଣ୍ଡି ଅଲଗା ହୋଇଯାଇଥିଲା।
ସୂଚନା ଅନୁସାରେ, ଯାତ୍ରୀ ଜଣକ ହେଉଛନ୍ତି ବଲାଙ୍ଗୀର ଥାନା ଅନ୍ତର୍ଗତ ଗେଡି ଗାଁର ବାଳକୃଷ୍ଣ ଅଦାବରିଆ। ସେ ଓ ତାଙ୍କ ସ୍ତ୍ରୀ ଟ୍ରେନରେ ଯାତ୍ରା କରୁଥିଲେ। ବାଳକୃଷ୍ଣ କିଛି ସମୟ ପାଇଁ ପାଣି ବୋତଲ କିଣିବାକୁ ବାହାରକୁ ଆସିଥିବାବେଳେ ତାଙ୍କ ସ୍ତ୍ରୀ ସିଟରେ ବସିଥିଲେ। ବାଳକୃଷ୍ଣ ପାଣି ବୋତଲ କିଣିବାବେଳେ ଟ୍ରେନ ଛାଡ଼ି ଦେଇଥିଲା। ତେଣୁ ସେ ଟ୍ରେନରେ ଚଢ଼ିବାକୁ ଉଦ୍ୟମ କରିବା ସମୟରେ ଏହି ଦୁର୍ଘଟଣା ଘଟିଥିବା ଜିଆରପି ପକ୍ଷରୁ କୁହାଯାଇଛି। ପୁଲିସ ମୃତଦେହ ଜବତ କରିବା ସହ ଏକ ଅପମୃତ୍ୟୁ ମାମଲା ରୁଜୁ କରିଛି। ପରିବାର ଲୋକେ ଆସିବା ପରେ ଶବ ବ୍ୟବଚ୍ଛେଦ ହେବ ବୋଲି ଆରପିଏଫ ପୁଲିସ ସୂଚନା ଦେଇଛି।
