ମାଲକାନଗିରି: କରୋନା ଚିକିତ୍ସାଧୀନ ରୋଗୀଙ୍କ ଭଲମନ୍ଦ ସମ୍ପର୍କରେ ସୂଚନା ଜାଣିପାରୁନଥିବା ନେଇ ବାରମ୍ବାର ଅଭିଯୋଗ ହୋଇ ଆସୁଥିଲା। ଏଥିପାଇଁ ପ୍ରଶାସନ ଓ ସ୍ବାସ୍ଥ୍ୟ ବିଭାଗ ବିଭିନ୍ନ ସମୟରେ ଅପବାଦ ବି ମୁଣ୍ଡାଉଥିଲା। ଏବେ କିନ୍ତୁ ସେଥିରୁ ତ୍ରାହି ପାଇବାକୁ ମାଲକାନଗିରି ଜିଲା ପ୍ରଶାସନ ଆରମ୍ଭ କରିଛି ‘ଇ-ସାକ୍ଷାତ’ ବ୍ୟବସ୍ଥା। ଚିକିତ୍ସାଧୀନ ରୋଗୀଙ୍କ ସହ ସିଧାସଳଖ ଦୃଶ୍ୟଶ୍ରାବ୍ୟ ଜରିଆରେ ସମ୍ପର୍କୀୟମାନେ ସମ୍ପର୍କ ସ୍ଥାପନ କରିବାକୁ ରାଜ୍ୟର ପ୍ରଥମ ଜିଲା ଭାବେ ମାଲକାନଗିରି ଜିଲା ପ୍ରଶାସନ ଏଭଳି ପଦକ୍ଷେପ ନେଇଛି।
ଜିଲାପାଳ ୟେଦୁଲା ବିଜୟଙ୍କ ତତ୍ତ୍ବାବଧାନରେ ଏହା ଆରମ୍ଭ ହୋଇଛି। ଇ-ସାକ୍ଷାତ ନାମରେ ଏକ କେନ୍ଦ୍ର ଜିଲା ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ଛକରେ ଖୋଲା ଯାଇଛି। ସମ୍ପର୍କୀୟମାନେ ଏହାରି ଜରିଆରେ କରୋନା ରୋଗୀଙ୍କ ସହ ଦୃଶ୍ୟଶ୍ରାବ୍ୟ ଜରିଆରେ ସିଧାସଳଖ ବାର୍ତ୍ତାଳାପ କରିବା ସହ ସେମାନଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝି ପାରିବେ। ମାଲକାନଗିରି ପୁରୁଣା ଚିକିତ୍ସାଳୟ ତଥା ବର୍ତ୍ତମାନର କରୋନା ଚିକିତ୍ସାଳ, ବି.ଏଡ କଲେଜ କରୋନା ଯତ୍ନ କେନ୍ଦ୍ର, ସଂଗରୋଧ କେନ୍ଦ୍ର ପ୍ରଭୃତି ସ୍ଥାନରେ ରହୁଥିବା କରୋନା ଆକ୍ରାନ୍ତଙ୍କ ସବିଶେଷ ତଥ୍ୟ ପ୍ରଶାସନ ପ୍ରଦାନ କରିଛି। ଏହି ସବୁ କେନ୍ଦ୍ରରେ ଚିକିତ୍ସାଧୀନ ରୋଗୀଙ୍କ ସହ ସର୍ମ୍ପକୀୟମାନେ ଇ-ସାକ୍ଷାତ ଜରିଆରେ କଥାବାର୍ତ୍ତା କରିବେ। ଭାରତ ବର୍ଷରେ ଏଭଳି ପ୍ରୟାସ କେଉଁଠି ହୋଇନି। ଆଗାମୀ ଦିନରେ ସବୁ ବ୍ଲକ କରୋନା ଚିକିତ୍ସା କେନ୍ଦ୍ରରେ ଏଭଳି ବ୍ୟବସ୍ଥା କରାଯିବ ବୋଲି ଜିଲା ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି।
ଅନ୍ୟ ଜିଲା ତୁଳନାରେ ମାଲକାନଗିରି ଜିଲାର ସ୍ଥିତି ବର୍ତ୍ତମାନ ଭଲରେ ଅଛି । ମାଲକାନଗିରି ଜିଲା ସବୁଜ ବଳୟରେ ରହିଛି। କରୋନାର ଦ୍ୱିତୀୟ ଲହରରେ ମାଲକାନଗିରି ଜିଲାରେ ପ୍ରତିଦିନ ୩୦ରୁ ୩୫ ମଧ୍ୟରେ ଆକ୍ରାନ୍ତଙ୍କ ସଂଖ୍ୟା ରହିଥିଲା। ଗତ ଦୁଇଦିନ ଧରି ଜିଲାରେ ଆକ୍ରାନ୍ତଙ୍କ ସଂଖ୍ୟା ଦୁଇଗୁଣା ବଢି ଯାଇଛି। ଆନ୍ଧ୍ର, ତେଲେଙ୍ଗାନାରୁ ମୋଟୁ ସୀମାନ୍ତ ଦେଇ ୧୩ ହଜାରରୁ ଅଧିକ ପ୍ରବାସୀ ଜିଲା ଭିତରକୁ ପ୍ରବେଶ କରିଛନ୍ତି। ମୋଟୁ ସୀମାରେ ଯାଞ୍ଚ ବ୍ୟବସ୍ଥାକୁ କଡାକଡି କରା ଯାଇଛି। ମୋଟୁ ସୀମାରେ ପ୍ରବାସୀଙ୍କ ପାଇଁ ୨୫ଟି ପ୍ରେରଣ କକ୍ଷ ଖୋଲିବାକୁ ନିଷ୍ପତ୍ତି ନିଆ ଯାଇଛି। ଜିଲା ନୋଡାଲ ଅଧିକାରୀ କୃଷ୍ଣଚନ୍ଦ୍ର ମହାପାତ୍ରଙ୍କ ତତ୍ତ୍ବାବଧାନରେ ଚିକିତ୍ସା ବ୍ୟବସ୍ଥା ଚାଲିଛି।
A two-way video interaction facility for Covid +ve patients admitted at DCH and CCC/DCHC facilities in #Malkangiri district has been initiated recently. This enables the Patient's family and the patient to interact with each other & see their loved ones through live video chat. pic.twitter.com/V0mylcF5tK
— COLLECTOR MALKANGIRI (@dm_malkangiri) May 6, 2021
