ମାଲକାନଗିରି ଜିଲାରେ ଅନ୍ଧବିଶ୍ବାସର କରୁଣ ଚିତ୍ର, କରୋନାରୁ ବର୍ତ୍ତିବା ପାଇଁ ଶିଶୁଙ୍କୁ ଦିଆଯାଉଛି ଦେଶୀ ରନ୍ଧା ମଦ

ମାଲକାନଗିରି : ପୁଣି ମାଲକାନଗିରି ଜିଲାରେ ଅନ୍ଧବିଶ୍ବାସର ଏକ କରୁଣ ଚିତ୍ର ସାମ୍ନାକୁ ଆସିଛି। ମହାମାରୀ କରୋନା ସଂକ୍ରମଣରୁ ବର୍ତ୍ତିବା ପାଇଁ ଛୋଟ ଛୋଟ ଶିଶୁମାନଙ୍କୁ ଦେଶୀ ରନ୍ଧା ମଦ ପିଇବାକୁ ଦିଆଯାଉଥିବାର ଏକ ଭିଡିଓ ଭାରରାଲ ହେଉଛି। ଯେଉଁ ଭିଡିଓରେ ଦେଖାଯାଉଛି କି ଛୋଟ ଶିଶୁମାନଙ୍କୁ ଧାଡିରେ ବସାଯାଇ ଦେଶୀ ରନ୍ଧା ମଦ ଦିଆଯାଉଛି। ମିଳିଥିବା ସୂଚନା ଅନୁସାରେ ମାଲକାନଗିରି ଜିଲା ପଡିଆ ବ୍ଲକର ମାଟେରୁ ପଞ୍ଚାୟତର ପ୍ରଶନପାଲି ଗାଁରେ ଆଦିବାସୀଙ୍କ ବିବାହ ପରେ କରସା ପରମ୍ପରା ଭୋଜିରେ ଶହଶହ ଛୋଟ ପିଲାମାନଙ୍କୁ ଦେଶୀ ରନ୍ଧା ମଦ ପିଇବା ପାଇଁ ଦିଆଯାଇଥିଲା।

କେବଳ ଏତିକି ନୁହେଁ କରୋନା କଟକଣାର ଧଜିଆ ଉଡାଇ ଶହ ଶହ ଲୋକ ଏକତ୍ରିତ ହୋଇଥିବାର ଦେଖିବାକୁ ମଧ୍ୟ ମିଳିଛି। ଏକତ୍ରିତ ହୋଇଥିବା ଲୋକଙ୍କ ମଧ୍ୟରେ କାହାରି ମୁହଁରେ ନଥିଲା ମାସ୍କ କି ନଥିଲା ସାମାଜିକ ଦୂରତା। କରୋନା ମହାମାରୀ ପାଇଁ ପିଲାମାନଙ୍କୁ ରୋଗ ପ୍ରତିରୋଧକ ଶକ୍ତି ବଢାଇବା ଲାଗି ଦେଶୀ ରନ୍ଧା ମଦ ପିଇବା ପାଇଁ ଦିଆଯାଇଥିବା ଜଣାପଡିଛି।

କରୋନା ମହାମାରୀ ସମୟରେ ଶିଶୁ ଓ ବୃଦ୍ଧମାନଙ୍କୁ ଅଧିକ ଯତ୍ନବାନ ହେବାପାଇଁ ସ୍ବାସ୍ଥ୍ୟ ବିଭାଗ ଓ ରାଜ୍ୟ ସରକାର ମଧ୍ୟ ଅନୁରୋଧ କରୁଥିବା ବେଳେ ଆଦୀବାସୀ ଜନଜାତି ପରମ୍ପରା ନାମରେ ଅନ୍ଧବିଶ୍ବାସରେ ଛୋଟ ଛୋଟ ଶିଶୁମାନଙ୍କୁ ଦେଶୀ ରନ୍ଧା ମଦ ପିଇବା ପାଇଁ ଦେବା ଚର୍ଚାର ବିଷୟ ପାଲଟିଛି। ଏପରିସ୍ଥଳେ ଆଦିବାସୀ ଜନଜାତୀଙ୍କୁ ଏନେଇ ସଚେତନ କରାଯାଉନଥିବା ମଧ୍ୟ ଅଭିଯୋଗ ହେଉଛି।