ବଲାଙ୍ଗିର/ତୁଷୁରା, :ତୁଷୁରା ଥାନା ଅନ୍ତର୍ଗତ ମହିପୁର ଦିବ୍ୟସିଂ ଭୋଇ ହତ୍ୟା ଘଟଣାରେ ଅଭିଯୁକ୍ତ ପତିହନ୍ତା ମହିଳାକୁ ତୁଷୁରା ପୁଲିସ ରବିବାର ଗିରଫ କରିଛି । ଅଭିଯୁକ୍ତ ମହିଳା ହେଲେ ମୃତ ଦିବ୍ୟସିଂ ଭୋଇଙ୍କ ପତ୍ନୀ ଯଶୋଦା ଭୋଇ(୨୫) । ସକାଳ ସାଢ଼େ ଦଶଟାରେ ବୁରୋମାଲ-ସମରା ରାସ୍ତାରୁ ଯଶୋଦାଙ୍କୁ ଗିରଫ କରି କୋର୍ଟକୁ ଚାଲାଣ କରା ଯାଇଥିବା ତୁଷୁରା ପୁଲିସ ସୂଚନା ଦେଇଛି ।
ପୁଲିସ ସୂଚନା ଅନୁସାରେ, ଦିବ୍ୟସିଂ ଭୋଇଙ୍କ ପରିବାର ଲୋକେ ଶୁକ୍ରବାର ରାତିରେ ଘରେ ଶୋଇଥିଲେ । ରାତି ପ୍ରାୟ ୨ଟାରେ ହଠାତ କବାଟ ଖୋଲିବା ଶବ୍ଦ ହେବାରୁ ଦିବ୍ୟସିଂଙ୍କ ଭାଇ ଦୀପକ ନିଦରୁ ଉଠି ପଡି କବାଟ ବାହାରେ ତାଙ୍କ ଭାଉଜ ଯଶୋଦା ଛିଡା ହୋଇଥିବା ଦେଖିଥିଲେ । ଏତେ ରାତିରେ କାହିଁକି କବାଟ ଖୋଲିଲ ବୋଲି ସେ ଭାଉଜଙ୍କୁ ପଚାରିଥିଲେ । ତେବେ ଯଶୋଦା କୌଣସି ଉତ୍ତର ନଦେଇ ବାହାରୁ ଦୌଡି ପଳାଇଥିଲେ । କ’ଣ ହୋଇଛି ଜାଣିବା ପାଇଁ ଦୀପକ ବଡଭାଇ ଦିବ୍ୟସିଂ ଶୋଇଥିବା କୋଠରୀକୁ ଯାଇଥିଲେ ।
ସେଠାରେ ଦିବ୍ୟସିଂ ରକ୍ତ ଜୁଡୁବୁଡୁ ହୋଇ ଛଟପଟ ହେଉଥିଲେ । ପରିବାର ଲୋକେ ତାଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ ବଲାଙ୍ଗିର ଭୀମ ଭୋଇ ଡାକ୍ତରଖାନାକୁ ଆଣିଥିଲେ । ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତ ଦିବ୍ୟସିଂଙ୍କ ବାପା ରଜନୀକାନ୍ତ ଶନିବାର ଦିନ ତୁଷୁରା ଥାନାରେ ହତ୍ୟା ଅଭିଯୋଗ କରିଥିଲେ । ତାଙ୍କ ବୋହୂ ଯଶୋଦା ଭୋଇ, ପୁଅ ଦିବ୍ୟସିଂ ଭୋଇକୁ ହତ୍ୟା କରି ଫେରାର୍ ହୋଇ ଯାଇଥିବା ସେ ଅଭିଯୋଗରେ ଦର୍ଶାଇ ଥିଲେ । ତୁଷୁରା ଥାନାଧିକାରୀ ସଞ୍ଜୀବ ପଧାନ ଓ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ । ପୁଲିସ ଘଟଣାସ୍ଥଳରୁ ହତ୍ୟାକାଣ୍ଡରେ ବ୍ୟବହୃତ ରକ୍ତ ଲଗା କୁରାଢ଼ୀ, ପିନ୍ଧା ବସ୍ତ୍ର ଓ ଅନ୍ୟାନ୍ୟ ପ୍ରମାଣ ଜବତ କରିଥିଲା । ଫେରାର୍ ଯଶୋଦାକୁ ଗିରଫ ପରେ ରବିବାର ଥାନାରେ ପଚରା ଉଚୁରା କରାଯାଇଥିଲା । ମୃତ ଦିବ୍ୟସିଂ ଭୋଇଙ୍କୁ ହତ୍ୟା କରିଥିବା ପତ୍ନୀ ଯଶୋଦା ପୁଲିସ ନିକଟରେ ସ୍ୱୀକାର କରିଥିଲା । ଦିବ୍ୟସିଂ ବିଭିନ୍ନ ସମୟରେ ତାଙ୍କୁ ଆକ୍ଷେପ କରିବା ସହ ନିର୍ଯାତନା ଦେଉଥିଲେ । ଏପରିକି ତାଙ୍କୁ ମାରି ଦେବାକୁ ଉଦ୍ୟମ କରୁଥିଲେ । ନିର୍ଯ୍ୟାତନା ସୀମା ଅତିକ୍ରମ କରିବାରୁ ସେ ଅତିଷ୍ଠ ହୋଇ ସ୍ୱାମୀଙ୍କୁ କୁରାଢ଼ୀରେ ହାଣି ହତ୍ୟା କରିଥିବା ଯଶୋଦା ପୁଲିସକୁ କହିଥିବା ବଲାଙ୍ଗିର ଏସଡିପିଓ ତୋଫାନ ବାଗ ସୂଚନା ଦେଇଛନ୍ତି । ତୁଷୁରା ପୁଲିସ ଯଶୋଦାକୁ ଗିରଫ କରି ଆଜି କୋର୍ଟ ଚାଲାଣ କରିଥିବା ତୁଷୁରା ଥାନାଧିକାରୀ ଶ୍ରୀ ପଧାନ କହିଛନ୍ତି ।
Comments are closed.