ମଙ୍ଗଳବାର ଦିନ ହନୁମାନଙ୍କୁ ପୂଜା କରାଯାଇଥାଏ। ପୌରାଣିକ ମାନ୍ୟତା ଅନୁସାରେ ଏହି ଦିନ ହନୁମାନଙ୍କର ଜନ୍ମ ହୋଇଥିଲା। ଏହା ସହିତ ହନୁମାନଙ୍କୁ ମଙ୍ଗଳ ଗ୍ରହର ନିୟନ୍ତ୍ରକ ମଧ୍ୟ କୁହାଯାଇଥାଏ। ତେଣୁ ଏହି କାରଣରୁ ମଙ୍ଗଳବାର ଦିନ ହନୁମାନଙ୍କର ପୂଜା କରିବାର ବିଧି ରହିଛି। ବିଶ୍ୱାସ ରହିଛି ଯେ, ଏହି ଦିନ ହନୁମାନଙ୍କର ଉପାସନା କରିବା ଦ୍ୱାରା ସାହସ, ଆତ୍ମବିଶ୍ୱାସ ଓ ଆତ୍ମଶକ୍ତି ପ୍ରାପ୍ତ ହୋଇଥାଏ।
ମହାଭାରତ ଗ୍ରନ୍ଥରେ ଉଲ୍ଲେଖ ରହିଛି ଯେ, ମହାଭାରତ ଯୁଦ୍ଧ ସମୟରେ ଅର୍ଜୁନଙ୍କ ରଥର ପତାକାରେ ହନୁମାନ ବିରାଜମାନ କରିଥିଲେ। ସମସ୍ତ ଯୁଦ୍ଧରେ ସେ ପାଣ୍ଡବମାନଙ୍କର ରକ୍ଷା ମଧ୍ୟ କରିଥିଲେ। ସେଥିପାଇଁ ଯେକୌଣସି କୋର୍ଟ କଚେରୀ ମାମଲା, ଆୟୁ ବୃଦ୍ଧି, ପରୀକ୍ଷାରେ ବିଜୟୀ ହେବା ପାଇଁ ମଙ୍ଗଳବାର ଦିନ ହନୁମାନଙ୍କୁ ଗେରୁଆ ରଙ୍ଗର ପତାକା ଦାନ କରନ୍ତୁ।
ତୁଳସୀ ହେଉଛି ଭଗବାନ ବିଷ୍ଣୁଙ୍କର ଅତ୍ୟନ୍ତ ପ୍ରିୟ। ବିଷ୍ଣୁଙ୍କର ସମସ୍ତ ଅବତାରଙ୍କୁ ତୁଳସୀ ଅର୍ପଣ କରାଯାଇଥାଏ। ହନୁମାନ ପ୍ରଭୁ ଶ୍ରୀରାମଙ୍କର ପରମ ଭକ୍ତ ଅଟନ୍ତି। ଶ୍ରୀରାମଙ୍କୁ ତୁଳସୀ ଚଢାଇବା ଦ୍ୱାରା ସେ ଅତ୍ୟନ୍ତ ପ୍ରସନ୍ନ ଯାଆନ୍ତି। ତେଣୁ ହନୁମାନଙ୍କୁ ତୁଳସୀ ହାର ସମର୍ପିତ କରିବା ଦ୍ୱାରା ଆଶୀର୍ବାଦ ପ୍ରାପ୍ତି ହୋଇଥାଏ।
ପୁରାଣ ଅନୁସାରେ ମାତା ସୀତା ନିଜ ସ୍ୱାମୀ ପ୍ରଭୁ ଶ୍ରୀରାମଙ୍କୁ ପ୍ରସନ୍ନ କରିବା ପାଇଁ ନିଜ ମଥାରେ ସିନ୍ଦୁର ଲଗାଉଥିଲେ। ଏହା ଦେଖି ହନୁମାନ ମଧ୍ୟ ରାମଙ୍କୁ ପ୍ରସନ୍ନ କରିବା ପାଇଁ ନିଜ ଶରୀରରେ ସିନ୍ଦୁର ଲଗାଇଥିଲେ। ସେହିଦିନ ଠାରୁ ହନୁମାନଙ୍କୁ ସିନ୍ଦୁର ଚଢାଇବା ପରମ୍ପରା ରହି ଆସିଛି। ମନୋକାମନା ପୂର୍ଣ୍ଣ କରିବା ପାଇଁ ହନୁମାନଙ୍କୁ ସିନ୍ଦୁର ଚଢାଇବା ଦ୍ୱାରା ଶୁଭଫଳ ମିଳିଥାଏ।
