ପିପିଲି: ପିପିଲି ଥାନା ତେଇସିପୁର ପଞ୍ଚାୟତ ଅନ୍ତର୍ଗତ ଆବଲପୁର ଗ୍ରାମରେ ଗତକାଲି ବିଳମ୍ବିତ ରାତିରେ ଏକ ଘରର କବାଟକୁ ତାଡି ୩ଜଣ ଲୁଟେରା ଟଙ୍କା, ସୁନା ଅଳଙ୍କାର ଓ ମୋବାଇଲ୍କୁ ଲୁଟି ନେଇଛନ୍ତି । ଲୁଟେରାଙ୍କ ଆକ୍ରମଣରେ ଗୃହକର୍ତ୍ତାଙ୍କ ସମେତ ତାଙ୍କ ପତ୍ନୀ ଆହତ ହୋଇଛନ୍ତି । ପିପିଲି ଓ ସାତଶଙ୍ଖ ଫାଣ୍ଡି ପୁଲିସ ଘଟଣା ସ୍ଥଳରେ ପହଞ୍ଚି ଅନୁସନ୍ଧାନ ଚଳାଇଥିବା ବେଳେ ଲୁଟେରାଙ୍କ ସଂପର୍କରେ ଅଦ୍ୟାବଧି ପୁଲିସକୁ କୌଣସି ସୁରାକ ମିଳିପାରି ନଥିବା ସୂଚନା ମିଳିଛି ।
ଆବଲପୁର ଗ୍ରାମର ହରେକୃଷ୍ଣ ରାଉତ (୬୦), ତାଙ୍କ ପତ୍ନୀ ତିଳୋତମା ରାଉତ (୫୨) ଓ ମାଆ କୁନ୍ତଳା ରାଉତ (୯୦) ବୁଧବାର ରାତିରେ ଘରେ ଶୋଇଥିବା ବେଳେ ରାତି ପ୍ରାୟ ଗୋଟାଏ ସମୟରେ ତିନିଜଣ ଦୁର୍ବୁତ୍ତ ଉକ୍ତ ଘରର କବାଟକୁ ତାଡି ଘର ମଧ୍ୟରେ ପଶିଥିଲେ । ସେମାନେ ଏକ କାଠଫାଳିଆରେ ତିଳୋତମାଙ୍କୁ ନିସ୍ତୁକ ମାଡ ମାରି ପିନ୍ଧିଥିବା ସୁନା କାନଫୁଲକୁ ଲୁଟି ନେଇଥିଲେ । ପରେ କୁନ୍ତଳାଙ୍କୁ ମାଡିବସି ତାଙ୍କ କାନରୁ ମଧ୍ୟ ସୁନା କାନଫୁଲକୁ କାଢି ନେଇଥିଲେ । ହରେକୃଷ୍ଣ କିଛି କହିବା ପୂର୍ବରୁ ଏକ ଭୁଜାଲିରେ ତାଙ୍କ ବାମହାତ ପାପୁଲିକୁ ଏକ ଚୋଟ ମାରିଥିଲେ । ପରେ ଦୁର୍ବୁତ୍ତ ମାନେ ଉକ୍ତ ଘରେ ଥିବା ଆଲମିରା, ଆଟାଚି, ଟ୍ରଙ୍କ ଆଦିକୁ ତନ୍ନ ତନ୍ନ କରି ଯାଞ୍ଚ କରିବା ସହ ଆଲ୍ମିରାରେ ରଖାଯାଇଥିବା ୧୦ହଜାର ୫ଶହ ଟଙ୍କା ଲୁଟି ନେଇଥିଲେ । ଯିବାବେଳେ ସେମାନେ ହରେକୃଷ୍ଣଙ୍କ ଠାରୁ ଦୁଇଟି ମୋବାଇଲ୍ ଫୋନକୁ ଛଡାଇ ନେଇ ଫେରାର ହୋଇ ଯାଇଥିଲେ ।