କଂଗ୍ରେସ-ଆପ ମେଣ୍ଟ ହେବ ନାହିଁ : ମନୀଷ ସିସୋଦିଆ

ନୂଆଦିଲ୍ଲୀ : ଆମ ଆଦମୀ ପାର୍ଟି (ଆପ) ନେତା ମନୀଷ ସିସୋଦିଆ ଲୋକସଭା ନିର୍ବାଚନ ପାଇଁ କଂଗ୍ରେସ ଏବଂ ଆମ ଆଦମୀ ପାର୍ଟି (ଆପ) ମଧ୍ୟରେ ମେଣ୍ଟ ନେଇ ଲାଗିଥିବା କଳ୍ପନାଜଳ୍ପନାର ଅନ୍ତ କରିଛନ୍ତି। ଲୋକସଭା ନିର୍ବାଚନ ପାଇଁ ଆପ ଓ କଂଗ୍ରେସ ମଧ୍ୟରେ କୌଣସି ମେଣ୍ଟ ହେବ ନାହିଁ ବୋଲି ମନୀଷ ଶନିବାର ପ୍ରକାଶ କରିଛନ୍ତି।
ମନୀଷ ସିସୋଦିଆ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ କଂଗ୍ରେସର ଦୁର୍ନୀତି ବିରୋଧରେ ଲଢି ଆମେ କ୍ଷମତାକୁ ଆସିଥିଲୁ। ଏବେ ସାମ୍ପ୍ରଦାୟିକ ଶକ୍ତିକୁ ହରାଇବା ପାଇଁ ଆମେ କଂଗ୍ରେସ ସହ ମେଣ୍ଟ କରିବାକୁ ଆଗେଇ ଆସିଥିଲୁ। ଦିଲ୍ଲୀ, ଗୋଆ, ହରିୟାଣା ଏବଂ ପଞ୍ଜାବରେ କଂଗ୍ରେସ ସହ ମେଣ୍ଟ କରିବାକୁ ପ୍ରସ୍ତାବ ରଖିଥିଲୁ। ଏଥିପାଇଁ ଆମେ କଂଗ୍ରେସ ଏବଂ ହରିୟାଣାର ଜେଜେପି ସହ କଥା ହୋଇଥିଲୁ। କିନ୍ତୁ କଂଗ୍ରେସ ଗୋଆ ଏବଂ ପଞ୍ଜାବରେ ମେଣ୍ଟ ପାଇଁ ମନା କରିଦେଇଛି। ଫଳରେ ଏହି ମେଣ୍ଟ ହୋଇପାରିବ ନାହିଁ। ଦିଲ୍ଲୀରେ କଂଗ୍ରେସର ଜଣେ ବି ବିଧାୟକ ନାହାନ୍ତି। ଗତ ନିର୍ବାଚନରେ କଂଗ୍ରେସ ପ୍ରାର୍ଥୀମାନେ ବହୁ କମ ଭୋଟ ପାଇଥିଲେ। ଆମେ ଦୁଇ ଦଳ ଏକାଠି ହୋଇ ବିଜେପିକୁ ହରାଇ ପାରିଥାନ୍ତୁ। ନରେନ୍ଦ୍ର ମୋଦୀ ଏବଂ ଅମିତ ଶାହାଙ୍କୁ ଅଟକାଇ ପାରିଥାନ୍ତୁ।
ସେହିପରି ଆପ ନେତା ସଞ୍ଜୟ ସଂହ କହିଛନ୍ତି ଯେ ଦିଲ୍ଲୀରେ କଂଗ୍ରେସର ଗୋଟିଏ ବି ସାଂସଦ ନଥିବାବେଳେ ସେ ୩ଟି ଲୋକସଭା ଆସନ ମାଗୁଛି। ପଞ୍ଜାବରେ ଆମର ୪ ଜଣ ସାଂସଦ ଥିବାବେଳେ କଂଗ୍ରେସ ଆମକୁ ଗୋଟିଏ ବି ଆସନ ଦେଉନି। ତେଣୁ ଆପ-କଂଗ୍ରେସ ମେଣ୍ଟ ସମ୍ଭବ ହୋଇପାରୁନାହିଁ।