ଶୀତଦିନେ ଓଠ ଫାଟିବା ସମସ୍ତଙ୍କ ପାଇଁ ଏକ ବଡ ସମସ୍ୟା। ଓଠ ଫାଟିବା ଦ୍ବାରା ଖାଇବାରେ ଅସହଜ ହେବା ସହ ଜଳାପୋଡା ହୋଇଥାଏ। ଆମେ ବଜାରରେ ମିଳୁଥିବା ଭେସଲିନ୍ ବା ଲିପ୍ବାମ୍ ଓଠରେ ଲଗାଇ ଥାଉ। ସେଗୁଡିକ କେମିକାଲ ଯୁକ୍ତ ହୋଇଥିବାରୁ ଓଠ ଖରାପ କରିବାର ଯଥେଷ୍ଟ ଆଶଙ୍କା ଥାଏ। ଏହା ସହ ଓଠ କଳା ପଡିଥାଏ। ତେବେ ଏଭଳି ପରିସ୍ଥିତିରେ ବଜାରରେ ମିଳୁଥିବା ଲିପ୍ବାମ୍ ବ୍ୟବହାର ନକରି ଘରେ ମଧ୍ୟ କିଛି ଜିନିଷ ବ୍ୟବହାର କରି ଆମେ ଓଠ ଫାଟିବାରୁ ରକ୍ଷା ପାଇପାରିବା। ଓଠକୁ ନରମ, କୋମଳ, ସୁନ୍ଦର ଏବଂ ଗୋଲାପି କରିପାରିବା।
ଗୋଲାପ ଫୁଲ ପାଖୁଡାକୁ ଛିଣ୍ଡାଇ ତାକୁ ପାଣିରେ ଭଲ ଭାବେ ଧୋଇ ଦିଅନ୍ତୁ। ତାକୁ କ୍ଷୀରରେ କିଛି ସମୟ ଭିଜାଇ ରଖନ୍ତୁ ପରେ ତାକୁ ପେଷ୍ଟ ବନାନ୍ତୁ। ପେଷ୍ଟକୁ ୧୫ମିନିଟ ରଖିବା ପରେ ଓଠରେ ଲଗାନ୍ତୁ। ଏପରି ନିୟମିତ କରିବା ଦ୍ବାର ଓଠ ନରମ ହେବା ସହ ଗୋଲାପି ହୋଇଥାଏ। ଫାଟିବା ସମସ୍ୟା ମଧ୍ୟ ବନ୍ଦ ହୋଇଯାଇଥାଏ।
ଘିକୁଆଁରୀର ଉପର ଚୋପାକୁ କାଟି ଦିଅନ୍ତୁ। ତାପରେ ତାକୁ ଓଠରେ ହାଲୁକା ଭାବେ ୫ମିନିଟ ଘଷନ୍ତୁ। ଏପରି କରିବା ଦ୍ବାରା ଓଠର ରୁକ୍ଷତା ଦୂର ହୋଇଯିବ। ରାତିରେ ଶୋଇବା ପୂର୍ବରୁ ଓଠରେ କାକୁଡି ରସ ଲଗାନ୍ତୁ। ଏପରି କରିବା ଦ୍ବାରା ଓଠ ନରମ ହେବା ସହ ପ୍ରାକୃତିକ ରଙ୍ଗ ଫେରି ପାଇଥାଏ।
ମହୁରେ ଅନେକ ପ୍ରକାରର ପୋଷକ ତତ୍ତ୍ବ ରହିଛି। ଏହାକୁ ଲଗାଇବା ଦ୍ବାରା ଓଠ ନରମ ହୋଇଥାଏ। ଏହା ସହ ଓଠ ଫାଟି ନଥାଏ।
ରାତିରେ ଶୋଇବା ବେଳେ ନାଭିରେ ସୋରିଷ ତେଲ ଲଗାନ୍ତୁ। ପ୍ରତିଦିନ ଏପରି କରିବା ଦ୍ବାର ଥଣ୍ଡା ହୋଇ ନଥାଏ। ଏହା ସହ ଓଠ ମଧ୍ୟ ଫାଟିନଥାଏ। ଓଠ ଫାଟିଥିଲେ ପାଚିଲା ଅମୃତଭଣ୍ଡା ରସ ଲଗାଇ ପାରିବେ। ଏହାଦ୍ବାରା ଓଠ କୋମଳ ଓ ନରମ ହୋଇଥାଏ।
