ମୁମ୍ବଇ: ସ୍ୱର ସାମ୍ରାଜ୍ଞୀ ଲତା ମଙ୍ଗେସକରଙ୍କ ଘରକୁ ସିଲ୍ କରିଛି ବିଏମ୍ସି। କରୋନା ମହାମାରୀକୁ ଦୃଷ୍ଟିରେ ରଖି ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇ ଲତା ମଙ୍ଗେସକରଙ୍କ ଘରକୁ ସିଲ୍ କରାଯାଇଛି। ୯୦ ବର୍ଷୀୟା ଲତା ମଙ୍ଗେସକର ଦକ୍ଷିଣ ମୁମ୍ବଇର ପେଡର ରୋଡରେ ଥିବା ‘ପ୍ରଭୁକୁଞ୍ଜ’ ବିଲ୍ଡିଂରେ ବସବାସ କରୁଥିଲେ। ତେବେ ଏହି କୋଠାକୁ ସିଲ୍ କରିବାର କାରଣ ହେଉଛି, ଅଧିକାଂଶ ବରିଷ୍ଠ ନାଗରିକ ଏଠାରେ ବସବାସ କରୁଛନ୍ତି।
ଲତାଙ୍କ ପରିବାରବର୍ଗ ସ୍ପଷ୍ଟ ଭାବେ ଲୋକଙ୍କୁ ଜଣାଇ ଦେଇଛନ୍ତି କି, ପରିବାରର ସମସ୍ତ ସଦସ୍ୟ ସୁସ୍ଥ ଅଛନ୍ତି। କୌଣସି ପ୍ରକାର ଗୁଜବକୁ ବିଶ୍ୱାସ କରନ୍ତୁ ନାହିଁ। ଆମେ ସମସ୍ତେ ନିଜ ଯତ୍ନ ନେବା ସହ ସାବଧାନତା ଅବଲମ୍ବନ କରୁଛୁ। ବିଶେଷକରି ବରିଷ୍ଠ ନାଗରିକ ଏବଂ ଅନ୍ୟ ସଦସ୍ୟମାନଙ୍କର କଲ୍ୟାଣ ଏବଂ ନିରାପତ୍ତା ପାଇଁ ନିଜନିଜ ଭିତରେ ସହଯୋଗ ରଖିଛୁ।
ସୂଚନାଯୋଗ୍ୟ, କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଉଥିବା ବେଳେ ମହାରାଷ୍ଟ୍ରରେ ସ୍ଥିତି ଖୁବ୍ ଗମ୍ଭୀର। କରୋନା ବୟସ୍କ ଓ ପିଲାମାନଙ୍କୁ ଅଧିକ ମାତ୍ରାରେ ସଂକ୍ରମିତ କରୁଥିବାରୁ ଏବେ ମହାରାଷ୍ଟ୍ରର ଯେଉଁ ଅଞ୍ଚଳରେ ଅଧିକାଂଶ ବରିଷ୍ଠ ନାଗରିକ ବସବାସ କରୁଛନ୍ତି ସେହି ଅଞ୍ଚଳକୁ ସିଲ୍ କରି ଦିଆଯାଉଛି।
