ଲାଞ୍ଜିଗଡ଼: ଭବାନୀପାଟଣାରୁ ରାୟଗଡ଼ାକୁ ସଂଯୋଗ କରୁଥିବା ୬ ନମ୍ବର ରାଜ୍ୟ ରାଜପଥର ବଞ୍ଜାରିଘାଟିରେ ଅଚଳ ହୋଇ ରହିଥିବା ଏକ ଟ୍ୟାଙ୍କର ପଛୁଆ ଗଡ଼ିଯାଇ ରାସ୍ତାକଡ଼ ଏକ ଖାଇରେ ଖସିପଡ଼ିଛି। ଏହି ଦୁର୍ଘଟଣାରେ ଟ୍ୟାଙ୍କରଟି ଓଲଟି ପଡ଼ିଥିବାବେଳେ ଅଳ୍ପକେ ବର୍ତ୍ତିଯାଇଛନ୍ତି ଚାଳକ ଓ ତାଙ୍କ ସହଯୋଗୀ। ଟ୍ୟାଙ୍କରଟି ରାସ୍ତାକଡ଼ ଦେଇ ଯାଇଥିବା ବିଦ୍ୟୁତ ତାର ଓ ଖୁଣ୍ଟ ଉପରେ ପଡ଼ିଯିବାରୁ କିଡିଙ୍ଗ, କାଉଗୁଡ଼ା, ମାଣିବନ୍ଧା ଓ ସିକେରକୁପାକୁ ବିଦ୍ୟୁତ ସଂଯୋଗ ବିଚ୍ଛିନ୍ନ ହୋଇଛି। ଏ ସଂପର୍କରେ ଖବର ପାଇ ସିକେରକୁପା ପୁଲିସ ଘଟଣାସ୍ଥଳରେ ପହଞ୍ଚିଛି।
ସୂଚନାଯୋଗ୍ୟ, ଆଜି ସକାଳେ ରାୟପୁରରୁ ବିଶାଖାପାଟଣା ଯାଉଥିବା ଟ୍ୟାଙ୍କରଟି ବଞ୍ଜାରିଘାଟି ଚଢ଼ୁଥିବାବେଳେ ଅଚଳ ହୋଇପଡ଼ିଥିଲା। ଫଳରେ ଟ୍ୟାଙ୍କରଟିର ପଛଚକରେ ପଥର ଦେଇ ତାକୁ ଅଟକାଇ ରଖାଯାଇଥିଲା। କିନ୍ତୁ ପଛୁଆ ଗଡ଼ାଣି ଥିବାରୁ ଦିନ ପ୍ରାୟ ୨.୩୦ ସମୟରେ ଟ୍ୟାଙ୍କର ଚକୁ ପଛରୁ ପଥର ଖସି ପଛୁଆ ଗଡ଼ିଯାଇ ରାସ୍ତାକଡ଼ରେ ଥିବା ଖାଇରେ ପଡ଼ିଯାଇଥିଲା। ଏଥିରେ ଚାଳକ ଓ ସହଯୋଗୀଙ୍କ ବିଶେଷ କ୍ଷତି ହୋଇନଥିବା ବେଳେ ଟ୍ୟାଙ୍କରଟି ଓଲଟି ପଡ଼ିବାରୁ ବ୍ୟାପକ କ୍ଷୟକ୍ଷତି ହୋଇଛି।
