ଲଣ୍ଡନ୍: ଭାରତରେ ମହିଳାଙ୍କ ସୁରକ୍ଷା ପ୍ରତି ଅଧିକ ଦୃଷ୍ଟି ଦେବାକୁ ଆନ୍ତର୍ଜାତିକ ମୁଦ୍ରାପାଣ୍ଠି ମୁଖ୍ୟ କ୍ରିଷ୍ଟିନେ ଲାଗାର୍ଡେ ଉପଦେଶ ଦେଇଛନ୍ତି। ମୋଦିଙ୍କ ଇଂଲଣ୍ଡ ଗସ୍ତ ଅବସରରେ ଲାଗାର୍ଡେ କହିଛନ୍ତି ଯେ ଭାରତରେ ମହିଳାମାନଙ୍କ କ୍ଷେତ୍ରରେ ଯାହା ଘଟୁଛି ତାହା ଘୃଣ୍ୟ ଓ ବିରକ୍ତିକର। ଏଥିପ୍ରତି ପ୍ରଧାନମନ୍ତ୍ରୀଙ୍କ ସମେତ ଭାରତର ଉଚ୍ଚ ଅଧିକାରୀମାନେ ଅଧିକ ଦୃଷ୍ଟି ଦେବା ଆବଶ୍ୟକ। ଏହାକୁ ନିଜ ବ୍ୟକ୍ତିଗତ ମନ୍ତବ୍ୟ ବୋଲି ଲାଗାର୍ଡେ ଅଭିହିତ କରିଛନ୍ତି। ମହିଳା ସୁରକ୍ଷା ପ୍ରସଙ୍ଗରେ ଗତ ଚାରିମାସ ମଧ୍ୟରେ ମୋଦିଙ୍କୁ ଲାଗାର୍ଡେଙ୍କ ଏହା ଦ୍ୱିତୀୟ ଉପଦେଶ ବୋଲି କୁହାଯାଉଛି। ଡାଭୋସ୍ଠାରେ ଅନୁଷ୍ଠିତ ବିଶ୍ୱ ଅର୍ଥନୈତିକ ସମ୍ମିଳନୀ ପରେ ଲାଗାର୍ଡେ ଏହି ପ୍ରସଙ୍ଗ ଉଠାଇଥିଲେ। ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାଷଣରେ ଭାରତର ମହିଳାଙ୍କ ସୁରକ୍ଷା ପ୍ରସଙ୍ଗରେ କିଛି ବି ଉଲ୍ଲେଖ ନଥିବାରୁ ଲାଗାର୍ଡେ ସମାଲୋଚନା କରିବା ସହିତ ସେ ସମ୍ପର୍କରେ ମୋଦିଙ୍କ ଦୃଷ୍ଟି ଆକର୍ଷଣ କରିଥିଲେ।
