ଆଠଗଡ : ଚଳିତ ଖରିଫ୍ ଋତୁରେ କୃଷକମାନେ ମଣ୍ଡିରେ ସେମାନଙ୍କର ବଳକା ଧାନ ବିକ୍ରୟ କରିବା ଲାଗି ବିଜୁ ଜନତା ଦଳ ପକ୍ଷରୁ ଏକ ସଚେତନତା ରଥର ଗୁରୁବାର ଶୁଭାରମ୍ଭ କରାଯାଇଛି। ଚଳିତମାସ ୨୩ତାରିଖରୁ ଜିଲ୍ଲା ତଥା ଆଠଗଡ ଉପଖଣ୍ଡରେ ଖରିଫ୍ ଧାନ ମଣ୍ଡି ଜରିଆରେ ଚାଷୀମାନଙ୍କ ଠାରୁ କ୍ରୟ କରାଯିବ ବୋଲି ରାଜ୍ୟ ସରକାରଙ୍କ ଦ୍ୱାରା ବିଜ୍ଞପ୍ତି ପ୍ରକାଶ ପାଇଛି। ଏ ଦିଗରେ ଆଠଗଡ ବ୍ଲକ ଅଞ୍ଚଳର କୃଷକମାନଙ୍କୁ ସଚେତନ କରିବା ଲାଗି ବିଜୁ ଜନତା ଦଳ ଓ ବିଜୁ କୃଷକ ଜନତା ଦଳ ପକ୍ଷରୁ ପ୍ରତି ପଞ୍ଚାୟତ ଅଧିନସ୍ଥ ସମସ୍ତ ଗ୍ରାମ ଏହି ସଚେତନତା ରଥ ବୁଲିବାର କାର୍ଯ୍ୟକ୍ରମ ରହିଛି। ଗୁରୁବାର ସ୍ଥାନୀୟ ବିଜୁ ଜନତା ଦଳ କାର୍ଯ୍ୟାଳୟ ସୂର୍ଯ୍ୟଭବନ ଠାରେ ବ୍ଲକ ବିଜେଡି ସଭାପତି ରବିନ୍ଦ୍ରନାଥ ରାଉତ ମୁଖ୍ୟଅତିଥି ଭାବେ ଯୋଗଦେଇ ଡାକବାଜି ଯନ୍ତ୍ର ଲାଗିଥିବା ଦୁଇଟି ସୁସଜ୍ଜିତ ଦୁଇଚକିଆ ଯାନ ସଚେତନତା ରଥ ଭାବେ ସବୁଜ ପତାକା ଦେଖାଇ ଶୁଭାରମ୍ଭ କରିଥିଲେ। ଏଥିରେ ସମ୍ମାନିତ ଅତିଥି ଭାବେ ବ୍ଲକ୍ କୃଷକ ବିଜେଡି ସଭାପତି ସୁବାସ ପାଳ ଓ ଆଠଗଡ ଏନଏସି ସଭାପତି ଶିଶିର ପ୍ରସାଦ ମାନସିଂହ ଯୋଗଦେଇଥିଲେ। ଚାଷୀମାନେ ଯେମିତି ଦଲାଲ ବା ତୃତୀୟ ପକ୍ଷଙ୍କ ଦ୍ୱାରା ଠକାମୀର ଶିକାର ନହୁଅନ୍ତି କିମ୍ବା ନିଜ ବଳକା ଧାନକୁ ଅଭାବି ବିକ୍ରି ନକରିବେ ସେ ଦିଗରେ ଏହି ରଥ ସେମାନଙ୍କୁ ସଚେତନ କରିବ ବୋଲି ଅତିଥିମାନେ ଆଶା ବ୍ୟକ୍ତ କରିଥିଲେ। ଏହି କାର୍ଯ୍ୟକ୍ରମରେ ବହୁ ସଂଖ୍ୟାରେ କୃଷକ ଯୋଗଦେଇଥିଲେ।
Comments are closed.