କେନ୍ଦୁଝରଗଡ଼: ତେଲକୋଇ ଥାନା ଅଧିନ ରଣବିଜୁଳିସ୍ଥିତ ଏଲ୍ ଆଣ୍ଡ ଟି କମ୍ପାନୀର ଷ୍ଟକ୍ ୟାର୍ଡରୁ ଡକାୟତି ପାଇଁ ଉଦ୍ୟମ କରୁଥିବାବେଳେ ୫ ଜଣ ଅଭିଯୁକ୍ତ ପୁଲିସ ହାତରେ ଧରାପଡ଼ି ଗିରଫ ହେବାସହ କୋର୍ଟ ଚାଲାଣ ହୋଇଛନ୍ତି। ଗତ ୧୨ ତାରିଖ ରାତିରେ ଏମାନଙ୍କୁ ଗିରଫ କରିଛି ପୁଲିସ। ଗିରଫ ଏହି ସମସ୍ତ ୫ ଅଭିଯୁକ୍ତ ପଡ଼ୋଶୀ ଢେଙ୍କାନାଳ ଜିଲା ମହାବୀରରୋଡ ଥାନା ଅଧିନ ଗଡ଼ପଳାଶୁଣୀ ଗ୍ରାମର ସନ୍ତୋଷ ସ୍ୱାଇଁ (୫୫), ସୁରେଶ ସାମଲ (୪୫), ବଡସହି ଗ୍ରାମର ଗୌତମ ସିଂହ, ମନୋରଞ୍ଜନ ପ୍ରଧାନ(୨୩) ଓ ପବିତ୍ର କିସାନ (୩୫) ବୋଲି ପୁଲିସ ସୂତ୍ରରୁ ଜଣାପଡ଼ିଛି। ଗିରଫ ଅଭିଯୁକ୍ତଙ୍କଠାରୁ ପୁଲିସ ଏକ ଟ୍ରକ ସହ ଲୁହା ପାଇପ, ଭୁଜାଲି, ଲୁହା ରଡ୍ ଆଦି ଜବତ କରିଥିବା ସଦର ଏସ୍ଡିପିଓ ମହେନ୍ଦ୍ରନାଥ ମୁର୍ମୁ ଜଣାଇଛନ୍ତି। ଡକାୟତି ଯୋଜନା ପାଇଁ ଉଦ୍ୟମ ଖବର ପାଇ ସ୍ଥାନୀୟ ଲୋକେ ଏହାକୁ ବିରୋଧ କରିବା ସମୟରେ ପଡ଼ୋଶୀ ଜିଲାରୁ ଆସିଥିବା ଡକାୟତଙ୍କ ସହ ଗ୍ରାମବାସୀ ମୁହାଁମୁହିଁ ହେବା ଫଳରେ କେତେକ ଗ୍ରାମବାସୀ ଆହତ ହୋଇ ତେଲକୋଇ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଛନ୍ତି। ଡାକୟତି ଯୋଜନାରେ ସମ୍ପୃକ୍ତ ଢେଙ୍କାନାଳ ଜିଲା ମହାବୀରରୋଡ ଥାନା ଅଧିକ ଗଡ଼ପଳାଶୁଣୀ ଗ୍ରାମର ଜିତେନ୍ଦ୍ର ବିଶ୍ୱାଳ, ବଡସାହି ଗ୍ରାମର ଗୋଲେଖ ପ୍ରଧାନ(୨୫) ଓ ସୁରେଶ ସାମଲ ଆହତ ହୋଇ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ପୁଲିସ ପକ୍ଷରୁ କୁହାଯାଇଛି।
Comments are closed.