କେନ୍ଦୁଝରଗଡ଼: ବୋରୱେଲ ପମ୍ପ ଚୋରି ମାମଲାରେ କେନ୍ଦୁଝର ଉପଖଣ୍ଡ ବିଚାରପତି ଅଭିଯୁକ୍ତକୁ ଏକ ବର୍ଷ ଜେଲ୍ ଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୫ହଜାର ଟଙ୍କା ଜୋରିମାନା ଏବଂ ଜୋରିମାନା ଅନାଦେୟ ଅଧିକ ୨ମାସ ସଶ୍ରମ କାରାଦଣ୍ଡାଦେଶ ମଧ୍ୟ ଶୁଣାଇଛନ୍ତି ଅଦାଲତ। କେନ୍ଦୁଝର ସହର ଉପକଣ୍ଠ ଠାକୁରପାଟଣା ଗ୍ରାମର ଆଶିଷ ପ୍ରିୟଦର୍ଶୀ ନିଜ ଚାଷ ଜମିରେ ଏକ ବୋରୱେଲ ଖୋଳି ପମ୍ପ ବସାଇଥିଲେ। ପମ୍ପ ବସାଇବା କିଛିଦିନ ପରେ ୨୭ ସେପ୍ଟେମ୍ବର ୨୦୨୪ ରାତିରେ ତାଙ୍କ ଜମିରେ ବୋରୱେଲରେ ବସାଇଥିବା ପମ୍ପକୁ ଗ୍ରାମର କାଳିଆ ଓରଫ ହେମନ୍ତ ନାଏକ ଚୋରି କରି ନେଇଥିବା ଜାଣିବା ପରେ ଏ ନେଇ ପ୍ରିୟଦର୍ଶୀ ୨୯ ସେପ୍ଟେମ୍ବର ୨୦୨୪ରେ ଟାଉନ ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇ ଟାଉନ ଥାନା ପୁଲିସ ପକ୍ଷରୁ ତତ୍ପରତା ପ୍ରକାଶ ପାଇ ଅଭିଯୁକ୍ତ କାଳିଆର ଘରୁ ଚୋରି ପମ୍ପକୁ ଉଦ୍ଧାର କରିବା ସହ ଏହି ମାମଲାରେ ପୁଲିସ ଅଭିଯୁକ୍ତ କାଳିଆକୁ ଗିରଫ କରି କୋର୍ଟ ଚାଲାଣ କରିଥିଲା। ଏହି ମାମଲାରେ ମୋଟ ୪ଜଣ ସାକ୍ଷୀଙ୍କ ବୟାନକୁ ଭିତ୍ତିକରି କେନ୍ଦୁଝର ଉପଖଣ୍ଡ ବିଚାରପତି ସୁମିତ୍ରା କୁମାରୀ ଦାଶ ଅଭିଯୁକ୍ତ କାଳିଆକୁ ବର୍ଷେ ଜେଲ ସହ ୫ହଜାର ଟଙ୍କା ଜୋରିମାନା ଏବଂ ଜୋରିମାନା ଅନାଦେୟ ଅଧିକ ୨ମାସ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ସରକାରଙ୍କ ପକ୍ଷରୁ ଏପିପି ସତ୍ୟବ୍ରତ ମହାନ୍ତି ଓ ହିମାଂଶୁ ଶେଖର ମହାନ୍ତି ମକଦ୍ଦମା ପରିଚାଳନା କରୁଥିଲେ।
Popular Categories
Previous article
Next article