କେନ୍ଦୁଝରଗଡ଼: ମଦ ପାଇଁ ଟଙ୍କା ନେଇ ଫେରସ୍ତ ନକରିବାରୁ ଯୁବକକୁ ଘରୁ ଡାକି ଅତି ନୃଶଂସ ଭାବେ ହତ୍ୟା କରିବା ଘଟଣା କେନ୍ଦୁଝର ସହରରେ ଚାଞ୍ଚଲ୍ୟ ଖେଳାଇ ଦେଇଛି। କାଶୀପୁର ଗ୍ରାମର ଅକ୍ଷୟ ନାଏକ (୩୦) କାଶୀପୁର ମୁଣ୍ଡା ସାହିର କିରଣ ମୁଣ୍ଡା ଠାରୁ ମଦ ଆଣିବା ପାଇଁ ୫୦୦ଟଙ୍କା ନେଇ ମାତ୍ର ୨୦ଟଙ୍କାର ମଦ ଆଣି ବାକି ଟଙ୍କା ଫେରସ୍ତ କରିନଥିଲା।
ଅକ୍ଷୟ ବୁଧବାର ରାତ୍ରିଭୋଜନ ପରେ ଶୋଇଥିବା ବେଳେ ରାତି ପ୍ରାୟ ୯ଟାରେ କିରଣ ମୁଣ୍ଡା (୨୮) ଅକ୍ଷୟକୁ ଘରୁ ଡାକି ଆଣି ଅତି ଅମାନୁଷିକ ଭାବେ ଗାଁ ଦାଣ୍ଡରେ ପିଟିପିଟି ହତ୍ୟା କରିବା ପରେ ଘୋଷାର ଘୋଷାରୀ ଆଣି ମୁଣ୍ଡା ସାହିରେ ଫିଙ୍ଗି ଚାଲି ଯାଇଥିବା ମୃତ ଅକ୍ଷୟର ସାନଭାଇ ମିଲନ ଅଭିଯୋଗ କରିଛି। ଗୁରୁବାର ଭୋର ସକାଳୁ ସ୍ଥାନୀୟ ଲୋକେ ଅକ୍ଷୟର ମୃତ ଦେହ ପଡିଥିବା ଦେଖି ଅକ୍ଷୟର ଘରେ କହିବାରୁ ପରିବାର ଲୋକେ ଜାଣିବାକୁ ପାଇଥିଲେ।
ଖବରପାଇ କେନ୍ଦୁଝର ଟାଉନ ଥାନା ଅଧିକାରୀ ରମାକାନ୍ତ ସାଏ ଘଟଣାସ୍ଥଳରେ ପହଞ୍ଚି ମୃତ ଶରୀରକୁ ଜବତ ପରେ ବ୍ୟବଛେଦ ପାଇଁ ପଠାଇବା ସହ ପ୍ରାଥମିକ ତଦନ୍ତ ଆରମ୍ଭ କରିଥିଲେ। ଏହି ଘଟଣାରେ ସମ୍ପୃକ୍ତ କିରଣ ମୁଣ୍ଡାକୁ ପୁଲିସ ଅଟକ ରଖି ହତ୍ୟାକାଣ୍ଡ ସମ୍ପର୍କରେ ଅଧିକ ପଚରାଉଚୁରା ଜାରି ରଖିଥିବା ଥାନା ଅଧିକାରୀ ଶ୍ରୀ ସାଏ କହିଛନ୍ତି।
Comments are closed.