ନୂଆଦିଲ୍ଲୀ : ଦିଲ୍ଲୀ ମୁଖ୍ୟ ଶାସନ ସଚିବ ଅଂଶୁ ପ୍ରକାଶଙ୍କୁ ଆମ ଆଦମୀ ପାର୍ଟି (ଆପ) ବିଧାୟକଙ୍କ ଆକ୍ରମଣ ଘଟଣା ପରେ ପ୍ରାଶାସନିକ ଅଧିକାରୀ ଓ ଜନପ୍ରତିନିଧି ମୁହାଁମୁହିଁ ସ୍ଥିତିରେ ଅଛନ୍ତି । ଫଳରେ ଦିଲ୍ଲୀ ବଜେଟ ଅଧିବେଶନ ନିମନ୍ତେ ଆୟୋଜିତ ଜନପ୍ରତିନିଧି ଓ ପ୍ରାଶାସନିକ ଅଧିକାରୀଙ୍କ ବୈଠକରେ ଅପ୍ରୀତିକର ପରିସ୍ଥିତି ଉପୁଜିବ ବୋଲି ଆଶଙ୍କା କରାଯାଉଛି । ତେବେ ଇତି ମଧ୍ୟରେ ଦିଲ୍ଲୀ ମୁଖ୍ୟ ଶାସନ ସଚିବ ଅଂଶୁ ପ୍ରକାଶ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ ମୁଖ୍ୟ ଅରବିନ୍ଦ କେଜେରିୱାଲଙ୍କୁ ଏକ କଟାକ୍ଷପୂର୍ଣ୍ଣ ପତ୍ର ଲେଖିଛନ୍ତି । ପତ୍ରରେ ଅଂଶୁ ପ୍ରକାଶ ଉଲ୍ଲେଖ କରିଛନ୍ତି ଯେ ବୈଠକରେ ପ୍ରାଶାସିନକ ଅଧିକାରୀଙ୍କୁ କୌଣସି ମୌଖିକ କିମ୍ବା ଶାରୀରିକ ଆକ୍ରମଣ ହେବନାହିଁ ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ପ୍ରଥମେ ସୁନିଶ୍ଚିତ କରାନ୍ତୁ । ଏହାପରେ ପ୍ରାଶାସନିକ ଅଧିକାରୀମାନେ ବୈଠକରେ ଯୋଗଦେବେ । ସେପଟେ ଦିଲ୍ଲୀ ଆଇଏଏସ୍ ସଂଘ ଏହି ଘଟଣାରେ ଦିଲ୍ଳୀ ମୁଖ୍ୟମନ୍ତ୍ରୀ ଅରବିନ୍ଦ କେଜେରିୱାଲ କ୍ଷମା ମାଗିବାକୁ ଦାବି କରିଛନ୍ତି । ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ ଏହି ବୈଠକରେ ମୁଖ୍ୟ ଶାସନ ସଚିବଙ୍କ ସମେତ ଅର୍ଥ ସଚିବ ଓ କେତେକ ବରିଷ୍ଠ ଅଧିକାରୀ ଯୋଗଦେବେ । ଏହି ବୈଠକକୁ ସିଧା ପ୍ରସାରଣ କରିବାକୁ ଆପ ଯୋଜନା କରୁଥିବା ସୂଚନା ମିଳିଛି । ପ୍ରାୟ ସପ୍ତାହେ ହେବ ଦିଲ୍ଲୀର ବିଭିନ୍ନ ବିଭାଗର କାର୍ଯ୍ୟରେ ଲାଗିରହିଥିବା ଅଚଳାବସ୍ଥା ଦୂର କରିବାକୁ ଏହି ବୈଠକରେ ପ୍ରୟାସ କରାଯିବ ବୋଲି କୁହାଯାଉଛି ।
