ଭୁବନେଶ୍ବର/ଢ଼େଙ୍କାନାଳ ସଦର : ଓଡ଼ିଶା ପାଇଁ ଏହା ବେଶ୍ ଦୁଃଖଦ ଖବର। ପୂର୍ବ ଭାରତର ପ୍ରଥମ ମହିଳା ଏଭରେଷ୍ଟ ଆରୋହରଣକାରିଣୀ କଳ୍ପନା ଦାସଙ୍କ ପରଲୋକ ହୋଇଯାଇଛି। କଳ୍ପନା ଗୁରୁବାର ଅପରାହ୍ଣ ୧୨.୫୫ରେ ନେପାଳସ୍ଥିତ ଏଭରେଷ୍ଟ ଶୀର୍ଷରେ ପହଞ୍ଚି ପାରିଥିଲେ। ତେବେ ଫେରିବା ବେଳେ କଳ୍ପନା ହଠାତ୍ ଅସୁସ୍ଥ ହୋଇ ପଡ଼ିଥିଲେ। ସେଠାରେ ଗୁରୁବାର ସନ୍ଧ୍ୟାରେ କଳ୍ପନାଙ୍କ ପ୍ରାଣବାୟୁ ଉଡ଼ି ଯାଇଥିଲା। ଏଭରେଷ୍ଟ କ୍ୟାମ୍ପର ଫ୍ଲୋର-୪ରେ ଥିବା ବାଲକୋନିରେ କଳ୍ପନାଙ୍କ ମୃତଦେହ ପଡ଼ିରହିଛି। ତାଙ୍କ ମୃତଦେହକୁ ଓଡ଼ିଶା ଆଣିବା ଲାଗି ପାଖାପାଖି ୩୦ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ଜଣାପଡ଼ିଛି।
ସୂଚନାଯୋଗ୍ୟ; ସାରାବିଶ୍ବରୁ ପ୍ରାୟ ୨୫୦ ପର୍ବତାରୋହୀ ବୁଧବାର ଏଭେରଷ୍ଟ ଅଭିଯାନରେ ବାହାରିଥିଲେ। ସେମାନଙ୍କ ମଧ୍ୟରୁ ୨୦୦ ଜଣ ଏଭରେଷ୍ଟ ଶୃଙ୍ଗର ଶୀର୍ଷରେ ପହଞ୍ଚିବାର କୃତିତ୍ବ ହାସଲ କରିଥିଲେ। ଏହି ୨୦୦ ଜଣଙ୍କ ମଧ୍ୟରେ କଳ୍ପନା ଥିଲେ। ତେବେ ଏକାସାଙ୍ଗରେ ୨୦୦ ପର୍ବତାରୋହୀ ଏଭରେଷ୍ଟ ଶୃଙ୍ଗରେ ଚଢ଼ିଥିବାରୁ ଫେରିବା ବେଳେ ଟ୍ରାଫିକ୍ ଜାମ୍ ବା ଭିଡ଼ ହୋଇଥିଲା। ଏହି କାରଣରୁ କଳ୍ପନାଙ୍କ ସହ ୩ ଜଣ ପର୍ବତାରୋହୀ ପ୍ରାଣ ହରାଇଛନ୍ତି। ‘ଡ୍ରିମର୍ସ ଡେଷ୍ଟିନେସନ୍ ଟ୍ରେକ୍ସ’ ସଂସ୍ଥା ଆନୁକୂଲ୍ୟରେ ଆୟୋଜିତ ଏଭରେଷ୍ଟ ଶୃଙ୍ଗ ଆରୋହଣ ପାଇଁ ୫୨ ବର୍ଷ ବୟସ୍କା ଓଡ଼ିଶାର କଳ୍ପନା ଦାସ ୩ ଜଣିଆ ମହିଳା ଅଭିଯାନ ଦଳର ସଦସ୍ୟା ଥିଲେ। ଏହି ଦଳରେ ଥିବା ଅନ୍ୟ ୨ ସଦସ୍ୟା ହେଲେ ନେପାଳର କାଞ୍ଚି ମାୟା ତମାଙ୍ଗ୍ ଓ ଚୀନ୍ର ଲିୟାମୁ ମା। ତିନିହେଁ ବୁଧବାର ଏଭରେଷ୍ଟ ଚଢ଼ିବା ଆରମ୍ଭ କରିଥିଲେ ଏବଂ ଗୁରୁବାର ମଧ୍ୟାହ୍ନରେ ଶୀର୍ଷରେ ପହଞ୍ଚିବାର କୃତିତ୍ବ ହାସଲ କରିଥିଲେ। ଶାଢ଼ି ପିନ୍ଧି ଏଭରେଷ୍ଟ ଶୀର୍ଷରେ ମଧ୍ୟ କଳ୍ପନା ଫଟୋ ଉଠାଇଥିଲେ। କିଛି ସମୟ ଏଭରେଷ୍ଟ ଶୀର୍ଷରେ ରହି କଳ୍ପନା ଓହ୍ଲାଇବା ଆରମ୍ଭ କରିଥିଲେ। ତେବେ ଅଳ୍ପ କିଛି ବାଟ ଆସି ଭିଡ଼ ଯୋଗୁଁ ସେ ଅଟକି ରହିଥିଲେ। ସେଠାରେ ସେ ଅସୁସ୍ଥ ଅନୁଭବ କରିଥିଲେ ଏବଂ ସନ୍ଧ୍ୟାରେ ପ୍ରାଣ ହରାଇଥିଲେ। କଳ୍ପନାଙ୍କ ଦଳର ଅନ୍ୟ ସଦସ୍ୟା ଫୋନ୍କରି କଳ୍ପନାଙ୍କ ପରିବାରକୁ ଏହି ଦୁଃଖଦ ଖବର ଜଣାଇଥିଲେ।
୧୯୬୬ ଜୁଲାଇ ୭ରେ ଢେଙ୍କାନାଳରେ ଜନ୍ମଗ୍ରହଣ କରିଥିବା କଳ୍ପନା ଜଣେ ପେସାଦାର ପର୍ବାରୋହୀଭାେବ ଭାରତ ତଥା ରାଜ୍ୟ ପାଇଁ ବେଶ ସୁନାମ ଅର୍ଜନ କରିଥିଲେ। ୨୦୦୮ ମେ ୨୧ରେ ପ୍ରଥମ ଓଡ଼ିଆ ତଥା ପୂର୍ବାଞ୍ଚଳର ପ୍ରଥମ ମହିଳା ପର୍ବତାରୋହୀ ଭାବେ ବିଶ୍ବର ଉଚ୍ଚତମ ଶୃଙ୍ଗ ଏଭରେଷ୍ଟ ଆରୋହଣ କରି ଇତିହାସ ସୃଷ୍ଟି କରିଥିଲେ। ଏହି ଏଭରେଷ୍ଟ ଅଭିଯାନ ଲାଗି ପାଣ୍ଠି ଯୋଗାଡ଼ ପାଇଁ କଳ୍ପନା ବହୁତ ପରିଶ୍ରମ କରିଥିଲେ। ପରେ କଳ୍ପନା ୨୦୧୦ରେ ଉତ୍ତର ଆମେରିକାର ମାଉଣ୍ଟ ଡାନିଏଲ, ମାଉଣ୍ଟ କିଲିମାଞ୍ଜାରୋ, ୨୦୧୪ ଅକ୍ଟୋବର ୯ରେ ଦକ୍ଷିଣ ଆମେରିକାର ତାନଜିଞ୍ଜ ରେଞ୍ଜ, ୨୦୧୫ରେ ମାଉଣ୍ଟ କିଲିମାଞ୍ଜାରୋକୁ ସଫଳତାର ସହିତ ଆରୋହଣ କରିଥିଲେ। ଏହାଛଡା ୨୦୧୫ ଡିସେମ୍ବର ୩ରେ ଭାରତର ପ୍ରଥମ ମହିଳା ପର୍ବତାରୋହୀ ଭାବେ ବିନା ଅମ୍ଲଜାନେର ପର୍ବତାରୋହଣ କରିଥିଲେ। କଳ୍ପନାଙ୍କ ପରଲୋକ ଖବର ପାଇବା ପରେ ଓଡ଼ିଶା କ୍ରୀଡ଼ାରେ ଶୋକର ଛାୟା ଖେଳିଯାଇଛି। ତାଙ୍କ ମରଶରୀର ଓଡ଼ିଶା ଆଣିବା ପାଇଁ ରାଜ୍ୟ ସରକାର ଉଦ୍ୟମ କରନ୍ତୁ ବୋଲି ବିଭିନ୍ନ ମହଲରୁ ଦାବିହୋଇଛି।
ବିଶ୍ବର ଉଚ୍ଚତମ ଶୃଙ୍ଗରୁ ଓହ୍ଲାଇବା ବେଳେ ପ୍ରାଣହରାଇଲେ
Popular Categories
Previous article
Next article