କାଲିମେଳା : ମାଲକାନଗିରି ଜିଲ୍ଲା ପଡିଆ ଥାନା ଅନ୍ତର୍ଗତ ଏମଭି-୫୯ ଗ୍ରାମର ଜଣେ ୫ ବର୍ଷର ନାବାଳିକାକୁ ଜଣେ ଯୁବକ ଦୁଷ୍କର୍ମ କରିଥିବା ପଡିଆ ଥାନାରେ ଅଭିଯୋଗ ହୋଇଛି। ପୁଲିସ ଏମଭି-୫୯ ଗ୍ରାମର ମହେନ୍ଦ୍ର ବିଶ୍ୱାସଙ୍କ ପୁଅ ସିତଲ ବିଶ୍ୱାସ (୨୧)କୁ ତେଲେଙ୍ଗାନାର ତିରୁପତି ଅଂଚଳରୁ ଗିରଫ କରିଥିବା ଜଣାପଡିଛିା ଖବରରୁ ଜଣାପଡିଛି ଯେ ଏମଭି-୫୯ ଗ୍ରାମର ଜୈନେକ ନାବାଳିକା ନିଜ ଘରେ ଏକା ଥିବା ଦେଖି ସିତଲ ତାକୁ ଦୁଷ୍କର୍ମ କରିଥିଲା। ନାବାଳିକାର ବାପା ବାହାରେ ରହି କାମ କରନ୍ତି। ମା ଓ ଝିଅ ଏକା ଘରେ ରହୁଥିଲେ। ଘଟଣା ଦିନ ମା ଘରେ ନଥିଲେ। ଏହାର ସୁଯୋଗ ନେଇ ଅଭିଯୁକ୍ତ ନାବାଳିକାକୁ ଦୁଷ୍କର୍ମ କରି ବାହାର ରାଜ୍ୟକୁ କାମ କରିବାକୁ ଯାଉଛି କହି ସେଠାରୁ ଫେରାର ହୋଇ ଯାଇଥିଲା।
ଘଟଣା ପଦାକୁ ନ ଆସୁ ଭାବି ପରିବାର ଲୋକ କାହାକୁ କିଛି ନକହି ପିଡୀତା ନାବାଳିକାକୁ ନେଇ ମାଲକାନଗିରି ମେଡିକାଲରେ ଚିକିତ୍ସା କରାଉଥିଲେ।
ତେବେ ଘଟଣା ଜଣାପଡିବା ପରେ ଏ ନେଇ ପିଡୀତାଙ୍କ ପରିବାର ଲୋକ ଗତ ୨୫ ତାରିଖ ଦିନ ମାଲକାନଗିରି ମା’ ଗୃହ ସହାୟତାରେ ପଡିଆ ଥାନାରେ ଲିଖିତ ଅଭିଯୋଗ କରିବା ପରେ ଘଟଣାର ତଦନ୍ତ ଆରମ୍ଭ ହୋଇଥିଲା । ମାଲକାନଗିରି ଏସପିଙ୍କ ନିର୍ଦ୍ଦେଶ କ୍ରମେ ଏସଆଇ ଜୟଦାସ ଖରାଙ୍କ ନେତୃତ୍ୱରେ ପଡିଆ ଥାନାର ଏକ ୪ ଜଣିଆ ଟିମ ସିତଲକୁ ଖୋଜିବାକୁ ବାହାରିଥିଲେ। ଓଡିଶାରୁ ଆନ୍ଧ୍ର ପ୍ରଦେଶ, ଆନ୍ଧ୍ର ପ୍ରଦେଶରୁ ତେଲଙ୍ଗାନା ଏବଂ ତେଲଙ୍ଗାନାରୁ ତାମିଲନାଡୁ ଏଭଳି ଚକ୍ମା ଦେଇ ବିଭିନ୍ନ ରାଜ୍ୟ ବୁଲୁଥିଲା।
ଅଭିଯୁକ୍ତକୁ ପୋଲିସ ଗିରଫ କରିଛି। ଗିରଫ ପରେ ତାକୁ କୋର୍ଟ ଚାଲାଣ କରାଯାଇଛି।