କଲମପୁର: କଲମପୁର ଜୁନାଗଡ଼ ମୁଖ୍ୟ ରାସ୍ତାର କଦଳିଚୁଆଁ ଛକ ନିକଟରେ ଗୁରୁବାର ଏକ ଅଜଣା ବାଇକ ଧକ୍କାରେ ଜଣେ ମୋପେଡ ଚାଳକ ଗୁରୁତର ଭାବେ ଆହତ ହୋଇଛନ୍ତି। ଗୁରୁତର ବ୍ୟକ୍ତିଙ୍କୁ ସ୍ଥାନୀୟ ଲୋକଙ୍କ ସହାୟତାରେ କଲମପୁର ଅଗ୍ନିଶମ ବାହିନୀ ଉଦ୍ଧାର କରି ଚିକିତ୍ସା ପାଇଁ କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। କିନ୍ତୁ ଅଧିକ ଚିକିତ୍ସା ଆବଶ୍ୟକ ଯୋଗୁଁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ସୂଚନା ଅନୁସାରେ, ଗୁରୁବାର ଦିନ ସାଢେ ୧୧ଟା ସମୟରେ ଶାଗବାରୀ ଗ୍ରାମର ଅନିରୁଦ୍ଧ ସାହୁ ଏକ ମୋପେଡ ଯୋଗେ କଲମପୁର ଜୁନାଗଡ଼ ମୁଖ୍ୟ ରାସ୍ତା ଦେଇ କଦଳିଚୁଆଁ ଯାଉଥିଲେ। କଦଳିଚୁଆଁ ଛକ ନିକଟରେ ଅନିରୁଦ୍ଧ ବାମ ପଟରୁ ଡାହାଣ ପଟକୁ ଯାଉଥିବା ବେଳେ ତାଙ୍କ ପଛରେ ଥିବା ଅନ୍ୟ ଏକ ଅଜଣା ବାଇକ ଚାଳକ ଭାରସାମ୍ୟ ହରାଇ ମୋପେଡକୁ ଧକ୍କା ଦେଇଥିଲେ। ଫଳରେ ମୋପେଡ ଚାଳକ ଅନିରୁଦ୍ଧ ସାହୁ ରାସ୍ତା ଉପରେ ଛିଟିକି ପଡ଼ି ଗୁରୁତର ହୋଇଥିଲେ। ଅନ୍ୟପଟେ ଅଜଣା ବାଇକ ଚାଳକ ଘଟଣାସ୍ଥଳରୁ ଫେରାର ମାରିଥିବା ଜଣାପଡ଼ିଛି। ଦୁର୍ଘଟଣା ସମ୍ବନ୍ଧରେ ସ୍ଥାନୀୟ ଅଗ୍ନିଶମ ବାହିନୀକୁ ସୂଚନା ଦେବା ପରେ ଓ.ଆଇ.ସି ଅନିଲ କୁମାର ବାରିକଙ୍କ ନେତୃତ୍ୱରେ ଶଙ୍କର ପ୍ରସାଦ ତ୍ରିପାଠୀ, ଡିସେମ୍ବର ବୁଡେକ, ନିର୍ମଳ ତରିଆ, ଗଜାନନ ମାଝୀ, ସଞ୍ଜୀବ କୁମ୍ଭାର ପ୍ରମୁଖ କର୍ମଚାରୀ ଘଟଣା ସ୍ଥଳରେ ପହଞ୍ଚି ଗୁରୁତର ଅନିରୁଦ୍ଧଙ୍କୁ ଉଦ୍ଧାର କରି କଲମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ। ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ଆମ୍ବୁଲାନ୍ସ ସହାୟତାରେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ତାଙ୍କ ବାମ ଗୋଡର ଆଣ୍ଠୁରେ ମାଡ ହେଇଥିବା ସୂଚନା ମିଳିଛି।
