କଲମପୁର: କଲମପୁର ଗୋଷ୍ଟୀ ସ୍ୱାସ୍ଥ୍ୟ କେନ୍ଦ୍ର ତରଫରୁ ଦୁର୍ଗାମାଧବ ହାଇସ୍କୁଲ ପରିସରରେ କୃମି ନାଶକ ବଟିକା ସେବନ ନେଇ ଏକ ତାଲିମ ଶିବିର ଆୟୋଜିତ ହେଇଯାଇଛି । ଆୟୋଜିତ ଏହି ଶିବିରରେ ଗୋଷ୍ଟୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଡାକ୍ତର ଶିବାଶିଷ ସ୍ୱାଇଁ ଅଧ୍ୟକ୍ଷତା କରିଥିଲେ । ବି.ଡି.ଓ ପ୍ରସନ୍ନ କୁମାର ପଟେଲ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ମହିଳା ଓ ଶିଶୁ ବିକାଶ ଅଧିକାରୀ ମନ୍ନ କୁମାରୀ ଲାମ୍ବା, ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ବାଳ ଗୋପାଳ ତେଣ୍ଡକାରୀ, ଭ୍ରାମ୍ୟମାଣ ସ୍ୱାସ୍ଥ୍ୟ ଦଳର ଡାକ୍ତର ଅମୂଲ୍ୟ କୁମାର ବେହେରା, ଡାକ୍ତର ଜ୍ୟୋର୍ତିମୟୀ ମହାନ୍ତି ପ୍ରମୁଖ ମଞ୍ଚାସୀନ ହେଇ କୃମି ନାଶକ ଔଷଧ ସେବନ ବିଧି ସମ୍ବନ୍ଧରେ ବୁଝାଇଥିଲେ । ଚଳିତ ମାସର ୧୨ ଏବଂ ୧୯ ତାରିଖ ଦିନ କୃମି ନାଶକ ଦିବ ପାଳନ କରାଯିବ ।
ଏହି ଦିନ ପ୍ରତ୍ୟେକ ବିଦ୍ୟାଳୟ, ଅଙ୍ଗନବାଡି କେନ୍ଦ୍ରରେ କୃମି ନାଶକ ଔଷଧ ପ୍ରଦାନ କରାଯିବ । ପ୍ରଥମ ଦିନ ଯେଉଁ ମାନେ କୃମି ନାଶକ ଔଷଧ ଖାଇବାରୁ ବଂଚିତ ହେବେ ସେମାନଙ୍କୁ ଦ୍ୱିତୀୟ ଦିନ ଅର୍ଥାତ ୧୯ ତାରିଖ ଦିନ ପ୍ରଦାନ କରାଯିବ । ୧ରୁ ୧୯ ବର୍ଷ ବୟସର ସମସ୍ତ ଶିଶୁ ଏବଂ ଯୁବକ ମାନେ ଏହି ଔଷଧ ଖାଇବେ । ୧ରୁ ୫ ବର୍ଷର ଶିଶୁଙ୍କୁ କୃମି ସିରଫ ଦିଆଯିବ ୬ରୁ ୧୯ ବର୍ଷର ବୟସର ଶିଶୁ ଓ ଯୁବକଙ୍କ ପାଇଁ ବଟିକା ଦିଆଯିବ । ଏହି ଔଷଧ ସେବନ ବିଦ୍ଧି ନେଇ ବ୍ଲକର ସମସ୍ତ ପ୍ରାଥମିକ, ଉଚ୍ଚ ପ୍ରାଥମିକ ଓ ଉଚ୍ଚ ମାଧ୍ୟମିକ ବିଦ୍ୟାଳୟର ପ୍ରଧାନ ଶିକ୍ଷକ ମାନେ ଯୋଗ ଦେଇ ତାଲିମ ଗ୍ରହଣ କରିଥିଲେ । ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଜନ ସ୍ୱାସ୍ଥ୍ୟ ଅଧିକାରୀ ହେମନ୍ତ କୁମାର ଶଗଡିଆ ଏହି ତାଲିମ ଶିବିରର ଆଭିମୁଖ୍ୟ ସମ୍ବନ୍ଧରେ ଆଲୋକପାତ କରିଥିଲେ । ବି.ପି.ଏମ ପ୍ରଶାନ୍ତ କୁମାର ପାଢୀ ଏହି ତାଲିମ ଶିବିର ଆୟୋଜନର ସମସ୍ତ ଦାୟିତ୍ୱ ସମ୍ପାଦିତ କରିଥିଲେ ।
